El grupu Llabor de la Universidá d'Uviéu torna a Cueiru pa desvelar l'orixe d'una de les feries más antigües del Noroeste

El grupu d'investigación Llabor de la Universidá d'Uviéu vuelve a Cueiru mientres esti mes de xunetu pa siguir los trabayos arqueolóxicos que desenvuelve dende va trés años en La Campa Cueiru. Les escavaciones realizaes hasta agora dexaron recuperar importantes testimonios del pasáu d'esti emblemáticu enclave del Camín Real de la Mesa.

Les investigaciones centráronse nel llugar onde se llevantaba l'antigua ilesia de Santa Marina y punxeron al descubiertu distintes fases constructives del edificiu relixosu, con una antigüedá a lo menos del sieglu XVI. Asina lo confirmen les dataciones realizaes sobre dellos enterramientos asociaos a la fase más antigua de la ilesia.

Sicasí, los afayos revelen una historia entá más antigua. Baxo los restos de la ilesia apaeció una construcción anterior, muncho más modesta y realizada con materiales perecederos, que pue asitiase ente los sieglos XII y XIII. Esti descubrimientu, xuníu a l'apaición de abundantes fragmentos de cerámica, numberosos clavos y delles monedes, apunta a que l'actividá humana nesti llugar empezó dellos sieglos enantes de lo que se pensaba.

Los arqueólogos consideren qu'estos afayos podríen tar rellacionaos colos oríxenes de la feria que se celebró en Cueiru hasta mediaos del sieglu XX. De confirmase esta hipótesis, la so antigüedá remontaríase a la Edá Media, convirtiendo a Cueiru nún de los primeros espacios vinculaos al intercambiu comercial documentaos arqueolóxicamente nel noroeste de la Península Ibérica.

Les campañes desenvueltes hasta'l momentu dexaron confirmar la importancia histórica d'esti llugar, que mientres sieglos funcionó como puntu d'alcuentru pa viaxeros, comerciantes y habitantes de la montaña. En concreto, la campaña d'esti branu va centrase na escavación de l'antigua venta vinculada al Camín Real, a la capiya de Santa Marina y al prau de Cueiru, un espaciu qu'históricamente tuvo asociáu al caltenimientu d'esti establecimientu.

La documentación caltenida pola familia del Marqués de Valdecarzana indica que la venta foi construyida nel sieglu XVI. Sicasí, los investigadores de la Universidá d'Uviéu esperen pescudar si esistieron ocupaciones anteriores, tal qu'ocurrió cola mesma capiya. L'oxetivu ye reconstruyir la evolución histórica d'esti edificiu y entender meyor el papel que desempeñó na rede de comunicaciones articulada alredor del Camín Real de la Mesa,marcáu por un bon númberu de ventes que se distribuyíen a lo llargo del so trazáu.

La escavación va desenvolvese mientres tol mes de xunetu y va tar abierta a toes aquelles persones interesaes en conocer de cerca la historia de Cueiru. Dende l'equipu d'investigación animen a vecinos, visitantes y amantes del patrimoniu a averase al xacimientu pa descubrir cómo l'arqueoloxía dexa reconstruyir sieglos d'historia a partir de los restos conservaos baxo tierra. «La presencia de visitantes non solo contribúi a espublizar la conocencia sobre'l pasáu de la contorna, sinón que tamién ayuda a valorar y protexer un patrimoniu que forma parte de la memoria colectiva del territoriu», apunta Margarita Fernández Mier, investigadora principal del grupu.

De forma paralela, el próximu 24 de xunetu programaron una xornada de puertes abiertes na que los miembros del equipu van esplicar los principales resultaos llograos hasta'l momentu y van amosar los trabayos que se tán realizando na escavación. «Dende les 11 de la mañana hasta les 6 de la tarde, el nuestru equipu va tar disponible pa recibir a toos aquellos que deseyen conocenos, esplicar los afayos realizaos y amosar de primer mano cómo trabayamos pa reconstruyir la historia d'esti estraordinariu llugar», anima Fernández Mier, recordando que p'aportar a Cueiru ye necesariu utilizar un vehículu touterrén.

Coincidendo con esta actividá, van entamase tamién talleres arqueolóxicos participativos, dirixíos especialmente al públicu infantil y xuvenil. Los participantes van poder collaborar colos arqueólogos en delles xeres de la escavación y descubrir, mientres un día, cómo ye'l trabayu de los que investiguen el pasáu. L'actividá ye gratuita.