El Muséu Arqueolóxicu avera al públicu les técniques de policromía medieval con demostraciones en vivu
Agora
Esta actividá, vinculada cola esposición Canteros del sonido, dexa contemplar el trabayu de reproducción y policromáu de pieces escultóriques del sieglu XIII
17 Jul 2026. Actualizado a las 17:41 h.
El Muséu Arqueolóxicu d'Asturies incorpora una nueva actividá al proyectu espositivu Canteros del sonido, con demostraciones en vivu del procesu de policromía de reproducciones de capiteles, caneciyos y otros elementos escultóricos medievales, una propuesta, qu'ufierta al públicu la oportunidá de descubrir cómo'l trabayu d'investigación y restauración contribúi a recuperar y entender el patrimoniu medieval.
La iniciativa tresllada al claustru del muséu'l trabayu de los especialistes Víctor Sanz-Yrazu y Fernando Oliva, los que realicen en directu'l procesu de testurizáu y policromáu de distintes reproducciones de pieces del sieglu XIII. Les persones visitantes van poder siguir caúna de les fases d'esti trabayu, conocer les técniques emplegaes, charrar colos investigadores y descubrir de primer mano un procesu que davezu se desenvuelve lloñe de la mirada del públicu.
La propuesta forma parte de la programación de la esposición Canteros del sonido, comisariada por Manuel Paz, que va tar abierta al públicu hasta'l 8 de payares. L'amuesa axunta años d'investigación nel ámbitu de la arqueomúsica y afonda na recuperación del patrimoniu sonoru medieval per aciu la reconstrucción de preseos y elementos escultóricos rellacionaos cola música.
Les demostraciones van dexar siguir el procesu de policromáu de reproducciones de delles de les pieces más representatives del románicu asturianu, como'l capitel del pórticu de la ilesia de Santa María de la Oliva (Villaviciosa), los caneciyos de San Esteban d'Aramil (Siero) o la recreación de la ilesia de Santolaya d'Uxo (Mieres), pa ufiertar una visión más completa del aspectu orixinal que pudieron presentar estes obres na Edá Media.
Amás de les demostraciones, ufiértense visites guiaes a la esposición, nes que s'esplica'l procesu d'investigación y reconstrucción y el valor patrimonial de les pieces qu'integren l'amuesa. L'actividá va celebrase tolos miércoles y xueves de los meses de xunetu y setiembre, ente les 11:00 y les 14:00 hores, mientres que les visites guiaes van programase a les 12:00 y a les 13:00 hores.