Consumidores Asturies sollerta de los postreros 90 díes pa reclamar pol cártel de los coches n'Asturies

Ente 2006 y 2013, el 95% de les marques d'automóviles qu'operaben n'España punxéronse d'alcuerdu p'afitar precios ya intercambiar información sensible, evitando asina la competencia real nel mercáu y perxudicando directamente a los compradores. Foi'l mesmu Grupu Volkswagen quien desatapó la trama énte la Comisión Nacional de los Mercaos y la Competencia (CNMC), qu'acabó imponiendo multes superiores a los 170 millones d'euros. Pa la Unión de Consumidores d'Asturies, sicasí, esa sanción alministrativa nun repara'l perxuiciu individual: «Esto ye la peor conducta de les empreses nuna economía de mercáu, yá que va directamente escontra la llibre competencia», declara Daciu Alonso, presidente de Consumidores Asturies. «Los verdaderamente perxudicaos fueron los ciudadanos. Cada comprador afectáu tien derechu a una compensación propia», afirma Alonso.

Los afectaos puen recuperar hasta 4.000 euros per vehículu adquiríu mientres el periodu del cartelu. Poro, la Unión de Consumidores d'Asturies anima a aprovechar el periodu vacacional p'axuntar la documentación necesaria y formalizar la reclamación cuanto enantes.

L'asociación atropa once sentencies favorables, con más de 500.000 euros recuperaos pa los sos socios. Esto supón la totalidá de les demandes colectives ganaes. Magar esti positivu balance, namás un 4% de los 140.000 asturianos afectaos por esta práctica illegal empecipiaron la tramitación pa reclamar lo que-yos correspuende.