L'asturianu va tar presente en Méxicu nun actu del colectivu Peri Feria. Artes en Resistencia

El 31 de xunetu a les 19 hores, va haber un alcuentru lliterariu enfotáu na llingua asturiana. L'actu, entamáu pol colectivu «Peri Feria. Artes en Resistencia» de Tepotzotlán (nel Estáu de Méxicu), va constar d'una contestualización per parte de la investigadora de la Universidá d'Uviéu, Lourdes Montes y una llectura de poemes de Diego Solís, poeta n'asturianu y castellán.

Tepotzotlán ye un pueblu de gran importancia histórica y cultural en Méxicu, reconocíu pola so herencia prehispánica y barroca. A lo llargo de los sieglos foi llar de persones relevantes de la cultura, les artes y la lliteratura. Ente les figures venceyaes a la so historia destaquen el polígrafu Carlos Sigüenza y Góngora, ún de los intelectuales más importantes de la Nueva España; los xesuites Francisco Xavier Alegre y Francisco Javier Clavijero, destacaos polos sos trabayos históricos y humanísticos; José Joaquín Fernández de Lizardi, consideráu'l primer novelista mexicanu; y Matiana del Espíritu Santo, figura de gran relevancia na tradición espiritual de la villa. Yá nel sieglu XX, Tepotzotlán atraxo a creadores como'l compositor y escritor José Gabilondo Soler «Cri-Cri», la pintora Yoshiko Shira y otros artistes y intelectuales que contribuyeron al so prestixu cultural. Anguaño sigue destacando pola so riqueza patrimonial y pola actividá de colectivos como «Peri Feria. Artes en Resistencia», que trabayen pa dar visibilidá a los artistes llocales, fortalecer la identidá comunitaria y fomentar l'accesu al arte dende una perspectiva participativa y social.

El colectivu «Peri Feria. Artes en Resistencia», nacíu en 2024 en Tepotzotlán, tien l'envís de facer eventos centraos na periferia del EdoMex y con gran interés na lliteratura, amuesa una propuesta que va más allá de la hexemonía y la cultura más comercial. El grupu ta conformáu pola xestora cultural Ileana Vergara, la directora de teatru Haydee Vergara, la artista plástica Evelyn Sixtos, l'artista plástica Dennise Reyes Barreto, la cantante Estefanía Márquez, el poeta y doctor en lletres Erik González y l'escritor Juan de Dios Maya Ávila Ehmibäthä.

Diego Solís (Xixón, 1991) ye escritor y profesor de Llingua y Lliteratura, tanto española como asturiana. Coordinó y collaboró con distintos colectivos y revistes dedicaes al desenvolvimientu del talentu mozu n'Asturies. Foi ganador en dos ocasiones del Premiu Asturias Xoven de Poesía, amás d'algamar dellos premios en concursos de microrrellatu y participar como xuráu en distintos certámenes lliterarios. Collabora de manera habitual na revista Lliteratura de l'Academia de la Llingua Asturiana, asina como en diversos medios y periódicos asturianos. Publicó cinco llibros de poesía; con Cállanos con esa música (Impronta, 2019) ganó'l Premiu Asturias Xoven de Poesía de 2018, y con Nosotros, la primavera (Trabe, 2025) volvió consiguilu na edición de 2024. Volvemos en 6 minutos (Cuatro Gotes, 2022) ye'l so últimu poemariu n'asturianu publicáu hasta agora. Nos últimos años participó en dalgunos de los eventos lliterarios más relevantes d'Asturies, como'l POEX, la Selmana Negra, la Feria del Llibru de Xixón o los ciclos QED.

Lourdes Montes (Tepotzotlán, 1993) ye investigadora del programa de Doctoráu n'Investigaciones Humanístiques de la Universidá d'Uviéu. Estudió Lletres hispániques y romániques entre México y España. Los sos proyectos empobínense al estudiu de les llingües minorizaes, la gastrollingüística y la sociollingüística. L'actu va facese nel Ateneu de Música y Arte de Tepotzotlán (AMATT) y la entrada va ser llibre.