Puru Remangu inaugura esti xueves 30 nel centru de Xixón la so nueva tienda y espaciu cultural

Seis años dempués d'abrir la so oficina n'El Natahoyo, el proyectu cultural y creativu Puru Remangu múdase al centru de Xixón. Nel númberu 14 de la cai Llibertá (paralela a la c/Corrida) asítase'l llar nuevu de la marca; un llocal de dos plantes formáu por tienda y almacén na parte baxa y espaciu cultural y oficina na planta superior. Esti xueves de 19h a 22h ye la folixa d'inauguración cola participación de dellos artistes llocales, DJs y pinchéu.

Una pareya formada pol gaiteru Llorián García y la tamboritera Vanessa Areces y los bailladores tradicionales Nelson Díaz y Marina Rodríguez van ser los encargaos d'abrir l'actu. Tres d'ello, los responsables de la marca van dir presentando caún de los espacios del llocal alternándolo con actuaciones rellacionaes con caún d'esos espacios. D'esta manera, na Antoxana actúa'l Coru Xorrecer (formación «sorpresa» qu'usa esti nome pa esta actividá per primer y última vez); nel espaciu de Musicasturiana.com (que tamién tien tienda, almacén y oficina nesti llocal) va cantar Mapi Quintana y nel d'Artístiques (na que se venden vinilos y llibros creaos por muyeres y/o en llingües minorizaes) recita Sofía Castañón. La última de les actuaciones va ser la d'Alicia Álvarez nel Requexín de la reciella, l'espaciu dedicáu al públicu infantil.

La folixa va siguir col pinchéu y bebida de cortesía (cerveza Ordum, agua y refrescos Fuensanta y vermú Picofino) y la pinchada musical de Les Collacies DJ Set, el dúu formáu poles DJs Lucía Dilema y La Güeriata. Tamién va ponese a la venta la colección Puru Xixón, creada a costa fecha pa inaugurar esti espaciu y que ta diseñada pola reconocida artista urbana brasileña MARIÊ, que fizo la so segunda intervención artística del Estáu español pintando les columnes de la tienda d'esti llocal. A la fin, l'actu d'esti xueves ye una folixa diversa que quier reflexar l'apueste de Puru Remangu polos sos valores cimeros: identidá asturiana, feminismu y defensa del comerciu llocal y de cercanía.

Cola apertura d'esti espaciu, Puru Remangu quier siguir siendo un motor de la cultura asturiana y por eso, amás de vender los sos productos, va tener nesti llocal una programación cultural variada articulada al rodiu la cultura y la creatividá asturiana, la diversidá cultural y llingüística y la igualdá. Talleres, charres, esposiciones, presentaciones, proyecciones, formaciones… son dalgunes de les posibles actividaes que dirán desendolcándose en pasando'l mes d'agostu.