Consumidores Asturies carga contra la multa a Aucalsa y anuncia demandes masives pa los afectaos del peaxe del Güerna
Agora
La organización, pionera en denunciar a la concesionaria y n'esixir xusticia pa los conductores del Güerna, valora la sanción del gobiernu como un pasu insuficiente y anuncia l'entamu inmediatu de demandes civiles masives y ensin costu pa los más de 8.000 afectaos rexistraos
31 Jul 2026. Actualizado a las 17:21 h.
La Unión de Consumidores d'Asturies valoró la resolución del Gobiernu d'Asturies d'imponer una sanción de 1.100.000 euros a Autopista Astur-Leonesa, S.A. (Aucalsa) por infracciones mui graves en materia de consumu. La organización, primer entidá en denunciar formalmente a la concesionaria del Güerna y en reclamar la devolución de los peaxes cobraos mientres les obres, celebra que l'Alministración autonómica diera por fin la razón a los conductores, pero alvierte de que l'importe de la multa quédase mui curtiu frente al perxuiciu real causáu a los usuarios.
Dacio Alonso, presidente de la Unión de Consumidores d'Asturies, punxo sobre la mesa les cifres reales de la concesionaria de l'AP-66. Aucalsa factura una media de 50 millones d'euros añales, de los que más de 8 millones son beneficiu netu directu. Pa una empresa que gana 8 millones d'euros al añu a cuenta d'un serviciu degradáu, una multa de 1,1 millones nun ye un castigu, ye un costu operativu más. Puen dexá-ylu ensin que-y tremeza'l pulsu, declara Alonso.
Pa la organización, sancionar con poco más d'un millón d'euros a una empresa que siguió cobrando'l peaxe íntegru —16,20 euros pa turismos tres de la xubida del 2026— col 40% del trazáu afectáu por obres estructurales, convierte la multa nun simple costu operativu, asumible ensin alteriar un res el negociu. Nós pedíemos hasta 60 millones d'euros, cinco vegaes el beneficiu ilícitu llográu. Esa ye la única cifra que tien sentíu si de verdá se quier disuadir a Aucalsa de siguir faciendo negociu a cuenta de los conductores, añedió'l presidente de la Unión de Consumidores.
La Unión de Consumidores d'Asturies foi la primer organización en poner el focu públicu sobre'l Güerna, cuando n'ochobre del 2025 calificó'l cobru del peaxe como «manifiestamente illegal» y punxo en marcha un rexistru d'afectaos pa reclamar la devolución de lo pagao dende l'entamu de les obres. Meses dempués, en febreru del 2026, l'asociación foi tamién la primera en cifrar el beneficiu ilícitu d'Aucalsa y n'esixir la devolución inmediata a los conductores, y poco dempués llevó'l casu a la Fiscalía Cimera d'Asturies por un presuntu delitu d'estafa. Llevamos más d'un añu diciendo lo mesmo, cuando naide más lo dicía. Güei la mesma Alministración danos la razón con esta sanción, pero la sanción llega tarde y llega curtia, sorrayó Alonso.
Alonso denunció con especial dureza lo que la organización considera un espoliu tapáu. Les obres de modernización de los siete túneles del Güerna finánciales el Ministeriu de Tresportes con cargu a los Presupuestos Xenerales del Estáu, col dineru de tolos contribuyentes. L'asociación reclama que'l Gobiernu central dexe de mirar escontra otru llau y suspenda cautelarmente el cobru del peaxe mientres persista esti incumplimientu contractual.