Consumidores Asturies denuncia'l doble xuegu d'Óscar Puente col Güerna, siendo cómplice de la prórroga y escudu xudicial de los abusos d'AUCALSA
Agora
Dacio Alonso compareció pa denunciar de «forma implacable la doble y impresentable actuación del Ministru de Tresportes, Óscar Puente, nel escándalu de l'autopista del Güerna (AP-66)»
21 Aug 2026. Actualizado a las 16:35 h.
La Unión de Consumidores d'Asturies compareció esta mañana en rueda de prensa pa denunciar de «forma implacable la doble y impresentable actuación del Ministru de Tresportes, Óscar Puente, nel escándalu de l'autopista del Güerna (AP-66)». El presidente de la organización, Dacio Alonso, esmazcaró la estratexa d'un Ministeriu que comete «un doble atropellu intolerable contra la ciudadanía asturiana: niégase a revertir la chambonada arbitraria del añu 2000 que la Comisión Europea esíxe-y anular, y agora quier torgar que s'aplique la Llei de Consumidores énte les flagrantes práctiques abusives d'una concesionaria que cobra'l 100% del peaxe por un serviciu que nun empresta».
Énte esti escenariu de bloquéu institucional provocáu por Madrid, la Unión de Consumidores llanzó una esixencia firme y urxente al Gobiernu d'Asturies: l'espediente sancionador tien que resolvese ensin más esperes. «Nun podemos dexar que les maniobres d'Óscar Puente conxelen los plazos», alvirtió Daciu Alonso. «Esiximos al Principáu que zarre y firme yá la resolución sancionadora de Consumu. Precisamos esi documentu oficial pa llevar de momentu a los xulgaos a les más de 8.000 persones que yá se dieron d'alta nel nuestru rexistru d'afectaos, coles mires de recuperar hasta l'últimu céntimu cobráu de forma illegal y abusiva». La organización recuerda que la sanción alministrativa ye'l pegollu xurídicu imprescindible pa que miles d'asturianos puedan esixir la devolución del so dineru pela vía civil.
La Unión de Consumidores quixo dexar meridianamente claro'l marcu xurídicu nel que se mueve esti conflictu, desmontando los intentos d'Óscar Puente de coartar les competencies del Principáu so la falsa sida de defender la titularidá estatal de la infraestructura. Alonso foi tayante: Los usuarios de l'autopista nun contraten col Ministeriu de Tresportes, contraten cola empresa privada que gocia —anque sía de forma illegal— de la concesión. Lo qu'analiza l'espediente de la Dirección Xeneral de Consumu d'Asturies, tres de la denuncia previa de la Unión de Consumidores d'Asturies, nun ye la inxeniería de la carretera, sinón si'l contratu de servicios ente l'usuariu y la concesionaria contién clauses y práctiques abusives. Nesta materia, la competencia autonómica de protección al consumidor ye esclusiva, plena y cunta col respaldu de la xurisprudencia del Tribunal Supremu.
La Unión de Consumidores d'Asturies anunció un xiru radical na so estratexa xurídica y celebra que'l Ministeriu de Tresportes exerciera'l so derechu llegal a personase nes actuaciones. nun vamos refugar la so presencia. Al contrario, viénnos perfecto que tea dientro, esplicó Dacio Alonso. AUCALSA yá se ta defendiendo judicialmente alegando que se llindó a executar lo qu'el mesmu Ministeriu -y ordenaba. Poro, al personase, Óscar Puente entra al espediente directu como responsable subsidiariu de los abusos de la empresa y va responder patrimonialmente pola chambonada qu'él mesmu autorizó y financió con dinero público.
Alonso esixó al Ministru qu'esplique públicamente por qué sigue bloquiando de forma sistemática la revisión d'oficiu del Real Decretu del añu 2000, que regaló a deu una prórroga de 29 años a la concesionaria hasta l'añu 2050 de forma contraria al derechu comunitariu. «La vía penal pa castigar aquella prevaricación del añu 2000 lamentablemente yá prescribió, pero la vía civil y patrimonial sigue dafechu viva. La Comisión Europea esixe nel so dictame motiváu recuperar la llegalidá del mercáu únicu frente a un contratu axudicáu ensin lluz nin taquígrafos».
La Unión de Consumidores conclúi alvirtiendo a Óscar Puente que'l so intentu d'actuar como abogáu defensor y escudu xudicial de los más de 8 millones d'euros en beneficios añales d'AUCALSA fracasó. «Al aprucir nel espediente sancionador de Consumu, el Gobiernu d'España queda retratáu énte la ciudadanía y atrapáu na so propia responsabilidá civil por amparar un atracu diariu ya intolerable na nuestra autopista del Güerna».