Asturies echa la rede a les autocaravanes: L'Entregu abre otra área de serviciu

El Conceyu de Samartín del Rei Aurelio va acondicionar un área d'autocaravanes con capacidá pa 10 vehículos nes proximidaes del Muséu de la Minería y la Industria (MUMI), en L'Entregu, la segunda del conceyu. El proyectu ta siendo redactáu pola oficina técnica municipal y ta presupuestáu en 6.778 euros. La idea ye que s'execute lo más rápido posible.

«Coles mires de potenciar el turismu y atrayer visitantes proyectamos la construcción d'esta área p'autocaravanes, un sector en puxanza nel nuesu país», esplica la conceyala de Turismu Cintia Ordóñez. El Gobiernu llocal considera que l'allugamientu ye'l más afayadizu, al tar xunto al principal reclamu turísticu del conceyu, el Muséu de la Minería, al llau del circuitu de ciclocross y con un accesu al paséu fluvial del Nalón.

La construcción d'esta área d'autocaravanes va obligar a suprimir delles places d'aparcamientu pa turismos alredor del MUMI, amás d'un parterre. Sicasí, l'Alministración llocal aportuna que va siguir habiendo aparcamientu abondo.

Les obres van llevase a cabu en dos fases. Nuna primer fas, va construyise la plataforma de carga, descarga y llimpieza, esto ye, l'área de servicios correspondiente, dotada de les redes de suministru d'agua y saneamientu. Nuna segunda actuación van llendase y señalizase les diez places del aparcaderu. Nel momentu que la plataforma tea operativa los vehículos van poder pernoctar aprovechando la disponibilidá d'espaciu na zona.

La nueva área d'autocaravanes va ser la segunda del conceyu, que yá cunta con una nel aparcamientu del pozu L'Entregu, con capacidá pa trés vehículos, que lleva funcionando dende l'añu 2010.