Queipo afirma que la oficialidá del topónimu Ría del Eo va permitir a los asturianos usalu «con total llibertá»

El diputáu del PP, Álvaro Queipo, afirmó esti domingu que reconocer la oficialidá del topónimu Ría del Eo xunto al yá reconocíu de Ría de Ribadeo supón que los asturianos puedan usar el primeru «con total llibertá». «Nun ye una guerra identitaria, enquivóquense los sectores gallegos que lo ven asina», indicó, p'añadir que «nunca se defende meyor lo propio despreciando lo ayeno». Amás, señaló que la postura asturiana nun pretende qu'en Galicia dexen d'usar el so topónimu, sinón que «los asturianos puedan permitise usar el de Ría del Eo con total llibertá».

Asina, defendió la reconocencia de los dos formes pa «facer oficial lo qu'existe de manera natural como reflexu de la convivencia». «Negar esta cooficialidá de les dos toponimies ye renegar de la convivencia de los vecinos gallegos y asturianos», señaló.

Queipo caltuvo esti domingu un alcuentru con conceyales del Eo p'analizar l'anunciu de la Subsecretaría de Tresporte, Movilidá y Axenda Urbana de que les acciones sobre'l doble topónimu Ría del Eo/Ría de Ribadeo tienen de ser retrotrayíes por un defectu de forma que les alegaciones de los gallegos señalaron.

El diputáu mostró'l so apoyu al Principáu nel procesu, anque llamentó que nun hubiera una respuesta pública más contundente, polo que va sustanciar una entruga a la Conseyera de Cultura, Turismu y Política Llingüística nel plenu de la Xunta Xeneral.