La Cámara de Comerciu pide consensu pa la macrorrexón atlántica

El presidente de la Cámara de Comerciu d'Uviéu, Carlos Paniceres, indicó que, depués de los últimos pasos, esperen llograr el consensu políticu de tolos grupos parllamentarios de la Xunta Xeneral pa la macrorrexón atlántica.

Nesi sentíu, indicó que yá se dirixieron al presidente del Gobiernu d'España, Pedro Sánchez, pa que esti sía ún de los oxetivos de la presidencia española de la Unión Europea.

Asina lo indicó Paniceres esti llunes en declaraciones a los medios en calteniendo una xunta col diputáu de Foru Asturies, Adrián Pumares, que quixo destacar l'apueste de la so formación por esti proyectu; informó Europa Press.

La diputada de Podemos Asturies, Covadonga Tomé, destacó esti martes les posibilidaes qu'ufierta pa la comunidá autónoma l'Arcu Atlánticu y incidió na necesidá de que la macrorrexón atlántica futura tenga en cuesta cuestiones culturales. Tomé destacó la necesidá de qu'Asturies forme parte de la macrorrexón, «pero teniendo en cuenta non namás el tema económicu, sinón tamién les posibilidaes identitarias y culturales».

«Tien que dir de la mano, nun se trata namás de favorecer a los poderes económicos, trátase de formar parte d'un too con mayor capacidá p'avanzar, pero ensin perder la identidá d'Asturies como país», quixo recordar. Amás, esperó que nesti exerciciu políticu haya otra oportunidá pa sacar alantre la reforma del Estatutu d'Autonomía.