Paniceres recuerda a Duro Felguera que foi ayudada y píde-y collaboración pa que Indra pueda instalase en Barros

El presidente de la Cámara de Comerciu d'Uviéu, Carlos Paniceres, resaltó la importancia de que Duro Felguera llegue a un entendimientu con Indra pa qu'esta compañía s'instale nel taller de Barros, en Llangréu. Paniceres, que participó n'Uviéu nuna xornada entamada por PwC sobre'l sector de la defensa, recordó qu'a Duro Felguera ayudáronlu nel so día los gobiernos central y rexonal.

«Agora toca que nos ayude tamién, pa ver si consiguimos alcontrar esa segunda inversión d'Indra n'Asturies», señaló. Amás, Paniceres consideró qu'una operación na qu'Indra pudiera facese coles instalaciones de Barros, propiedá de Duro Felguera, y producir ellí sirviría pa xenerar emplegu na zona de les contornes mineres.

«Yo creo que ye razonable pa les partes y, sobremanera, pal bien d'Asturies», comentó, recordando l'ésitu de la operación previa pola qu'Indra adquirió les instalaciones d'El Tallerón, en Xixón, a Duro Felguera y onde yá se ta produciendo. Según Paniceres, Duro Felguera tien «una delda histórica y moral con Asturies», colo qu'aportunó na importancia d'aprovechar la oportunidá y nun condergar les instalaciones de Barros. Encamentó a les partes a llegar a un alcuerdu, informa Europa Press.