Les voces de la llingua asturiana al traviés de los sieglos

L'Edificiu Departamental del Campus del Milán alluga hasta'l 14 de xunetu la esposición "Voces. La llingua n'Asturies al traviés de los sieglos", promovida pola Dirección Xeneral de Planificación Llingüística del Principáu d'Asturies, con conteníos ellaboraos por un equipu de la Universidá d'Uviéu coordináu por Xulio Viejo Fernández ya integráu tamién por Ramón d'Andrés y Roberto González Quevedo. L'amuesa plantega un percorríu pela hestoria llingüística d'Asturies dende los primeros pobladores del territoriu hasta la dómina actual.

Al traviés de 75 paneles, complementaos con vitrines con pieces orixinales o reproducciones, meses espositives y audiovisuales, ‘Voces’ ufierta al espectador una panorámica xeneral y actualizada sobre la cuestión, dende lo que se sabe de les llingües de los pueblos indíxenes prerromanos, pasando pol períodu de romanización o la llingua de los diplomes medievales hasta les primeres manifestaciones del romance asturianu y la so lliteratura y la penetración n'Asturies del castellán na Edá Moderna, considerando tou tipu d'avatares sociales, culturales y políticos hasta l'actualidá.

L'amuesa, que parte un enfoque humanista del fechu llingüísticu como fenómenu universal qu'asume n'Asturies una dimensión particular clave na configuración de la so identidá cultural, presentóse en septiembre de 2018 nel Muséu Arqueolóxicu d'Asturies, n'Uviéu, onde l'ésitu de públicu (más de cinco mil visitantes) fixo que se prorrogara hasta avientu del mesmu añu.

 "Voces" foi concebida pa itinerar por distintos llugares d'Asturies y, ello ye que foi esibida igualmente nos últimos meses na casa de Cultura de Cabranes antes de recalar nuevamente na capital, na Facultá de Filosofía y Lletres de la Universidá d'Uviéu, onde ye especialmente pertinente la so presencia como reflexu del trabayu d'investigación que desenvuelve la institución y como reclamu y estímulu pa estudiantes y profesoráu comenenciudu na materia.

 Con posterioridá a la so exhibición na Universidá d'Uviéu, "Voces" va tar presente n'otres ciudaes y villes asturianes como Cangas, Xixón, Corvera dientro d'este mesmu 2019, contemplándose nueves amueses n'otros puntos d'Asturies n'años socesivos