El Muséu de Belles Artes rescata al fotógrafu que nunca esistió

El Muséu de Belles Artes d'Asturies inaugura güei una esposición dedicada a José Zamora Montero (1874-1953), capataz de mines de la Real Compañía Asturiana d'oficiu, pero con una rica y, hasta agora, desconocida obra fotográfica. L'amuesa El fotógrafo que nunca existió recueye más de 1.200 semeyes, 990 d'elles asitiaes sobre dos teles de 35 metros que crucien en vertical el patiu del Palaciu de Velarde.

José Zamora Montero emigró a Asturies a finales del sieglu XIX movíu pola rellumanza de la metalurxa del cinc na rexón. A pesar de que nun se dedicó profesionalmente a la fotografía, Zamora dexó un archivu de más de dos mil semeyes. El Belles Artes espón hasta'l 6 d'ochobre les imáxenes de los obreros de la mina d’Arnau, que formen un documentu de primera llínia pa reconstruyir non yá la historia de la fotografía y de la industria del sector metalúrxicu del momentu, sinón tamién el trabayu d'una dómina. 

Amás d’estes semeyes, na amuesa tamién pueden contemplase otres instantánees d’índole familiar y oxetos como visores estereoscópicos qu'amuesen imáxenes con un efectu tridimensional.

Esta esposición ta comisariada pol historiador Juan Carlos de la Madrid y l'archiveru Alfonso García Rodríguez, autores d'una investigación que recuperó la figura de Zamora Montero y que foi recoyida nel llibru Fotografía, industria y trabajo. José Zamora Montero (1874-1953).