Cuasi un millón d'euros p'ayudes a la integración llaboral de persones con discapacidá

El Conseyu de Gobiernu d'Asturies aprobó esti xueves un gastu de 895.000 euros pa la convocatoria d'una llinia de subvenciones destinada a apoyar la integración nel mercáu llaboral de 710 persones con discapacidá severa.

Según informó'l Gobiernu al traviés d'una nota de prensa, estes ayudes, dirixíes a empreses y centros especiales d'empléu, tramítase en réxime de concurrencia competitiva, cubren parte de los costos salariales de los trabayadores y tienen financiación del Programa Operativu Fondu Social Européu (FSE), qu'ufre'l 80% de los recursos (716.000 euros), y del Principáu, qu'abona'l 20% restante (179.000).

La convocatoria d'ayudes va articulase al traviés de trés llinies dirixíes a centros especiales d'empléu constituyíos como empreses (500.000 euros), centros especiales d'empléu formaos por entidaes ensin ánimu d'arriquecimientu (166.000 euros) y empreses mercantiles (229.000).

Por cada empleáu discapacitáu va abonase mensualmente una ayuda del 10% del salariu mínimu interprofesional (SMI) vixente nel períodu que cubre la subvención, que va del 10 de xunetu de 2018 al 30 de xunu d'anguaño. Estes ayudes son complementaries a les que se conceden anualmente a persones con discapacidá contrataes en centros especiales d'empléu.