El perímetru del xacimientu en Samartín aumenta de los 6 a los 10 metros de diámetru

La cuarta fase d'intervención arqueolóxica nel xacimientu neolíticu de L'Españal, en Samartín del Rei Aurelio, sacó a la lluz afayos nuevos. Según informó'l Conceyu trátase d'información sobre les dos cámares funeraries alcontraes hai dos años, oxetos nuevos que se sumen a la dote funeraria yá identificada, y el descubrimientu d'unes cabianes qu'amplíen la perspectiva del estudiu del xacimientu. Sobre la llista d'oxetos relativos a la dote funeraria, añádese una punta de flecha, un núcleu del que se llogren les llasques pa tresformales n'oxetos --dambes realizaes sobre xil autóctono de Piloña--, y una plaqueta sobre arenisca.

Con esta intervención, l'arqueóloga que dirixió la investigación, Covadonga Ibáñez, informó de que'l perímetru del xacimientu aumenta de los 6 a los 10 metros de diámetru. La escavación n'área dexó ampliar la perspectiva del estudiu, alcontrándose una serie de cabianes en procesu d'investigación y «que'l so usu o función ta pendiente de dictame una vez se conozcan los resultaos de les analítiques de los sos sedimentos y la so cronoloxía al traviés del carbonu catorce», esplicaron dende'l Conceyu.

Rematada la escavación, ábrese agora una fase d'actuación nueva pa sintetizar tola información y poder estructurar el proyectu d'exhibición. La redacción d'esti proyectu museolóxicu va ser de la Oficina Técnica Municipal, la mesma arqueóloga y los restauradores Fernando Carrera y Carmen Feito, baxu l'autorización de la Comisión de Patrimoniu de la Conseyería d'Educación, y una vez conseñada financiación.