Cultura llanza les llinies nueves d'ayudes a empreses y profesionales del sector dotaes con 600.000 euros

La Conseyería de Cultura, Política Llingüística y Turismu llanzó les sos llinies nueves d'apoyu a los creadores y empreses culturales con un presupuestu global que se multiplica por cuatro en comparanza con 2021 hasta algamar los 600.000 euros.

El Gobiernu d'Asturies rediseñó'l sistema de subvenciones a los profesionales de la cultura pa ufiertar una llinia d'apoyu específicu a cada sector creativu y inclúi pela primer vez les ayudes directes al cine y los videoxuegos, señalaron dende l'Executivu. El Boletín Oficial del Principáu d'Asturies (Bopa) publica esti martes la convocatoria de les siete llinies d'ayudes, a les que bien ceo va sumase otra de creación lliteraria. El plazu de presentación de les solicitúes va tar abiertu hasta'l 22 de setiembre.

La modalidá d'apoyu nueva a profesionales y empreses pa la execución de proyectos culturales y acciones de formación y movilidá sustitúi a l'hasta agora vixente convocatoria única pa tolos sectores culturales. Les llinies específiques de subvenciones a los sectores creativos son al sector de les artes escéniques, dotada con 100.000 euros; al sector del llibru, dotada con 60.000 euros; a la música, con 100.000 euros; al audiovisual y cine, con 100.000 euros; les artes visuales, con 100.000 euros; videoxuegu, con 80.000 euros; y formación y profesionalización del sector cultural asturianu, con 30.000 euros.

Igualmente, nel Bopa publicaron les bases d'una llinia nueva d'ayudes pa la creación lliteraria, que se va convocar bien ceo pa que puedan concedese ayudes nel 2022, informa Europa Press.