Genaro Alonso: «El modelu que más-y convién a una llingua ye la cooficialidá»

El conseyeru d'Educación y Cultura del Principáu d'Asturies, Genaro Alonso, destacó esti martes en Xixón que como llingüista, falante y usuariu de la llingua asturiana, siempre dixo que «el modelu que más-y convién a una llingua ye la cooficialidá».

Y esto ye asina porque, según él, de lo que se trata ye de la «convivencia pacífica y harmónica» de dos o más llingües nun modelu de billingüismu. «Y eso garantízalo la cooficialidá», apuntó. «Eso parezme inatacable», remarcó en declaraciones a los medios de comunicación enantes de participar na inauguración de la xornada sobre esta ufierta educativa que se celebró nel Centru Integráu de Formación Profesional (CIFP) d'Hostelería de Xixón.

Sicasí, apuntó que ye un tema que tesciende a la so Conseyería y que pertenez al Parllamentu asturianu. Nesti sentíu, apuntó que les conclusiones del dictame van poder ser tomaes en consideración polos distintos grupos parllamentarios «o non», señaló.

De la mesma, remarcó que'l Gobiernu rexonal sigue nel marcu xurídicu que se marcó, que nun ye otru que la llei d'usu del añu 98. Dalgo que, según Alonso, ta nel programa de Gobiernu y ye'l marcu que se dieron pa esa Llexislatura.