L'abolición

La cultura asturiana ye tradicionalmente arreyada a la vaca como centru de la vida familiar rural. Hai obres antropolóxiques qu'afiten la importancia que tien na ganadería campesina y na economía. Asina como nel sistema de valores, sentimientos, comportamientos, símbolos y actitúes sociales. N'asturianu, correspuéndense les metáfores ente los animales, como les vaques, y los humanos. La cultura asturiana estrémase nesi sen de la visión tópica del toréu, como defendiera Xovellanos sobre la prohibición de los espectáculos públicos non didáuticos. Per otru llau, les corríes de toros yá nun son llegales nes Islles Canaries, Cataluña y nes Islles Baleares que yá votaron pa quitales del so territoriu. Galicia tien entamada una campaña pa ser la viniente comunidá autónoma n'aboliles. N'Asturies namái queda esaniciar la selmana de la feria de Begoña en Xixón pa quedar tamién llibres de maltratos públicos a los animales. La tauromaquia nun ye un deporte, porque nun hai rivales n'igualdá de condiciones. Ye un mou de sacrificiu sangrín, ayenu al llugar nel que vivimos. Nun ye un arte, porque nun produz belleza sinón muerte doliosa y cruel. El toru sufre mentes lu torturen impunemente. Poro, les alministraciones públiques nun han pagar o dexar places pa esta representación circense, más al mou de los romanos que de los circos ensin animales modernos. El Parllamentu Européu votó de recién escontra les sovenciones a la tauromaquia. Europa dexa de marafundiar 130 millones d'euros de la PAC empobinaes a los ganaderos de toros destinaos a la so muerte pública. Francia ta acabante desaniciar les corríes de toros del so patrimoniu cultural. Cada vegada más asociaciones y entidaes tán concienciaes cola abolición d'esti anacronismu que nun respeta los drechos de los animales. Nun mundiu más altruista, nun se pue creyer que les agresiones feches a unos herbívoros seyan una diversión. L'Asturies de güei tará más averada a Europa si s'axunta a les comunidaes autónomes abolicionistes, pal bientar animal.