La deceición d'Izquierda Xunida

Deceición. Nun se m’ocurre una pallabra que defina meyor lo que sentí al conocer la decisión d’Izquierda Xunida. Yera esperable, víase venir. Tratábase d’un secretu a voces. Tol mundu lo sabía, naide lo duldaba. Sí, pero yo quería creyer que diben ser diferentes, que diben ser valientes. Enquivoquéme. Deceicionáronme. O dexéme deceicionar. Izquierda Xunida nun va siguir alantre cola denuncia escontra la llegada de les universidaes privaes a Asturies. Una deceición, sí. Como la que de xuru sienten tamién munches y munchos militantes d’esti partíu, munches persones defensores de la educación pública que ven cómo la fuercia política pola que trabayen va imitar a Ayuso y abrir la puerta al elitismu y el clasismu de la privada.

Entiendo que ser Ovidio Zapico —o cualesquiera de les persones que lu acompañen nos órganos direutivos d’Izquierda Xunida— nun debe resultar cenciello. En 2023 teníen qu’escoyer ente quedar na oposición y nun poder xestionar o entrar nel Gobiernu d’Asturies siendo una minoría mui minoritaria y influyir direutamente nel Executivu de Barbón. Entiendo que ye difícil acertar. Escoyeron la segunda opción. Fueron testigos de tolo qu’arrodió al accidente na mina de Zarréu —nun pongo más pallabres pa nun m’envelenar—. Vieron cómo Lydia Espina primero y Gimena Llamedo y Guillermo Peláez depués maltrataben al profesoráu en fuelga y llegaben a acusanos de siguir los mandaos de la estrema derecha. Tán viendo les protestes de les educadores de les Escuelines ensin qu’Educación dexe de tratales de forma llaceriante. Quedaron callaos cuando la Conseyería de Salú firmó —y aplaudió— que los médicos tuvieren más facilidá pa trabayar en consultes privaes perxudicando la sanidá pública. Tampoco llevantaron la voz cuando Barbón tuvo mieu de Cepi y abrió la puerta de Costco, la mesma puerta que va zarrar más d’un comerciu en Siero gracies a esta midida. Izquierda Xunida aceutó too esto. En teoría, a cambiu de trabayar dende’l Gobiernu pa meyorar la vida de les asturianes. Na práutica, a cambiu de mui poco. A cambiu de migayes.

Borja Sánchez, conseyeru de Ciencia —tamién d’Industria, pero poco—, dicía va tres selmanes qu’Izquierda Xunida tenía que valorar les «consecuencies» de denunciar la implantación n’Asturies d’universidaes privaes. En llinguaxe más coloquial, más d’andar per casa, venía a dici-yos que tuvieren cuidáu. Un estilu más propiu del malu del patiu de la escuela o de persones con un nome qu’entama con «Vito». Izquierda Xunida recibió l’amenaza, entendió’l xantaxe y gachó les oreyes. Traicionó los sos princios como partíu d’izquierdes y aceutó otra humildación más de la FSA. Y nun van poques. Y non solo nesta llexislatura, qu’Asturies nun nació cola presidencia de Barbón —anque sintiéndolu a él pueda paecelo—.

Tovía s’atreven a xustificalo. Sal Ovidio Zapico énte los medios de comunicación y afirma que’l Gobiernu asturianu nun va permitir la entrada de más universidaes privaes. Home, solo faltaba. ¿Cuántes queríen? ¿78? ¿Una en cada conceyu? Eses declaraciones son una tomadura de pelo, una broma ensin gracia nenguna. Estudiantes asturiantes matándose delantre los apuntes buscando una nota altísima que-yos permita formase na Universidá d’Uviéu y les families con más perres pudiendo pagar miles y miles d’euros pa que los sos fíos vayan a la privada. Eso sí, con práutiques nel sistema públicu. El chiste va averándose cada día más a la categoría d’insultu.

¿Qué diría Ovidio Zapico si fuera’l Partíu Popular quien aplaudiere la llegada de les universidaes privaes? ¿Qué diría Izquierda Xunida si fuera Álvaro Queipo quien les recibiera cola alfombra puesta? Los berríos diben sentise hasta nel puntu más altu de Torrecerréu. Diben dicir que’l Gobiernu d’Asturies ta actuando escontra los intereses de les persones normales, de los trabayadores. Yá puen mirase nel espeyu.

Una deceición, sí. Como graduáu pola Universidá d’Uviéu, como profesor del enseñu públicu, tamién como votante d’Izquierda Xunida en dalguna cita eleutoral.

Si, Aína, la fuercia política na que milito, ficiera dalgo paecío, el carné acababa en COXERSA a los cinco minutos.