Nun somos tan pocos y de nenguna manera formamos una islla dientro de la sociedá. Remedando’l cantar de Ketama, sabemos bien lo que queremos y amás, dicímoslo con cordura y serenidá.
Los voceros del antiasturianismu suelen atribuyir al movimientu de recuperación del asturianu los mesmos propósitos qu’alimenten les sos palabres: una supuesta intención política y una pretendida voluntá impositiva. La demanda d’un estatus xurídicu más amañosu pa garantizar los derechos llingüísticos de la ciudadanía d’Asturies -pues nun ye otro lo que se quier llograr cola oficialidá- preséntase -qué paradoxa- como un discursu escluyente. Por eso ye tan importante enseñanos como lo que somos: un grupu social con oríxenes diversos que fai una reivindicación non por minoritaria, si vamos al númberu de falantes, menos llexítima.
Pa les que peinamos, o más bien, pintamos canes, les manifestaciones pola oficialidá constituyen un xeitu de ritual que se celebra, como mínimo, tolos Díes de les Lletres Asturianes. La insistencia nesta acción nun nos tien dao munches allegríes. Llevamos más de trenta años reclamando lo mesmo, porque les polítiques que se ficieron hasta’l momentu nun fueron a frenar la perda de falantes y porque’l marcu xurídicu que s’articuló pa dar validez llegal a la comunicación n’asturianu y en galloegoasturianu -la Llei 1/1998- amás de nun llegar a aplicase dafechu, nun ye a garantizar la igualdá ente les llingües d’Asturies no que cinca al so usu.
Los rituales, de toes formes, nun s’axusten a criterios meramente pragmáticos. La so funcionalidá ye indirecta: tien que ver tamién col sentimientu de xuntura qu’apodera a los que participen nellos. Na manifestación pola Oficialidá que se celebró’l sábadu n’Uviéu, esti sentimientu de xuntura, de misión colectiva, amplió de forma bien llamativa’l círculu de participantes en rellación con otres convocatories. Dexando aparte’l fechu de si en manifestaciones anteriores l’asistencia foi menor o más grande, lo cierto ye que nesta ocasión la sociedá asturiana acudió a la llamada en (casi) tola so pluralidá.
Nun somos una secta nin un club de radicales. Representamos a dellos sectores amplios y variaos de la sociedá asturiana. Nun pretendemos arrequexar al castellanu, porque tamién somos falantes d’esta llingua. Nun nos mueve’l porgüeyu económicu, ente otres coses porque na Asturies arruinada onde vivimos, facese ricu cola xestión de bienes culturales diba ser imposible. Tamos seguros, amás, de que la oficialización del asturianu y el gallegoasturianu diben valir p’aidanos a recuperar l’autoestima que nos falta como pueblu y pa incentivar l’actividá económica.
Na mañana del sábadu vi munches cares conocíes pero, por suerte, fueron munchísimes más les de les persones que nun conocía. Una participación abondosa de xente mozo, familes y entidaes qu’hasta agora nunca acudieran a les convocatories -como la FSA- dibuxen un horizonte esperanzador pal futuru del asturianu.
Agora correspuénde-yos a los partíos políticos dase por enteraos de la demanda. Asturies nun ye Cataluña. De fechu, si algo rescamplaba na marcha qu’avanzaba pela cai Uría, ye la tranquilidá de los participantes y la disminución de símbolos identitarios con respectu a les manifestaciones que se celebraben a finales del sieglu XX. Esta nun ye la cuestión. Tamos llistos y maduros pa que se nos concedan por fin los derechos que reclamamos. Porque ye de xusticia y porque lo que se quier consiguir con ellos nun ye dixebrar, ye integrar.