Van a poder presentase tolos escolinos y escolines que cursen l?asignatura de llingua asturiana y lliteratura
02 mar 2021 . Actualizado a las 20:30 h.El Serviciu de Normalización Llingüística de la Mancomunidá Cabu Peñes convoca esti Concursu Escolar de Micro-Rellatos nel so enfotu por facer espoxigar l’usu del idioma nel ámbitu educativu al traviés d’iniciatives con claru calter pedagóxicu y afitaes nel currículu d’Educación Primaria d’Asturies.
Van poder presentase al concursu tolos escolinos y escolines que cursen l’asignatura de llingua asturiana y lliteratura nes diferentes escueles de los conceyos de Carreño y Gozón, caún y caúna d’ellos/es va participar na categoría que-yos correspuenda pol cursu nel que tean: Categoría A, 3u y 4u d’Educación Primaria, y B, 5u y 6u d’Educación Primaria. Los micro-rellatos han tar n’asturianu y caún/a de los/es participantes namás que pue presentar una obra al concursu.
La estensión de cada obra nun pue ser menor de 100 palabres y nun pue superar les 400 palabres. Va valorase la calidá lliteraria y la orixinalidá de la temática, que va ser d’escoyeta llibre. Les obres van poder entregase hasta’l 14 de mayu. Los datos personales (nome y apellíos, escuela, cursu y grupu) tienen qu’apaecer na parte d’arriba de la fueya onde s’escriba’l rellatu, enantes del títulu d’esti.
El xuráu va tar compuestu pol responsable’l Serviciu de Normalización Lingüística de la Mancomunidá y por delles persones del conceyu venceyaes a la cultura asturiana. En caúna de les categoríes tienen d’escoyer un rellatu ganador.
Una vegada escoyíos los rellatos ganadores el xuráu va emitir el so fallu’l día 28 de mayu. Cada centru participante va tener un premiu por caúna de les categorías (2 ganadores-centru).
Tamién va haber una persona ganadora xeneral en cada categoría (si se presenten obres al concursu de más d’una escuela). La recoyida de los premios, no que se refier a la celebración o non d’un actu d’entrega, va depender de la situación sanitaria pola andancia’l Covid 19. Si nun fuere posible facer un actu públicu, los premios entregaríense nos Centros Educativos. Los premios de les dos categoríes van consitir nun llibru y nun CD, escritos y cantaos n’asturianu.