Cultura incorpora dos categoríes de los premios lliterarios: traducción y narrativa pa mozos
AGORA
La convocatoria de dambos ta prevista pal segundu semestre y cuenten con una dotación de 6.000 y 3.000 euros, respectivamente
06 abr 2021 . Actualizado a las 18:17 h.La Conseyería de Cultura, Política Llingüística y Turismu va ampliar anguaño les categoríes de los premios n'asturianu cola incorporación de dos gallardones: el Florina Alías, a la meyor traducción al asturianu, y el Enriqueta González Rubín, de narrativa pa mozos. La convocatoria de dambos ta prevista pal segundu semestre.
El Florina Alías, que va tener una dotación de 6.000 euros, va premiar obres yá publicaes, tanto en papel como en formatu dixital. El gallardón rinde homenaxe a la poeta y narradora Florina Alías (Cualloto,1921-Xixón,1999). La escritora publicó n'asturianu los llibros Señaldaes del Sueve (1980) y Xente de casa (1974). Amás, collaboró col doctor García Oliveros na realización del so Diccionario bable de la rima (IDEA, 1947), pero fundamentalmente foi una referencia poética de la lliteratura escrita n'asturianu na postguerra.
Asina, ganó la Primera Xusta Poética pa Traducción -el primer premiu de traducción de la lliteratura asturiana que l'Asociación d'Amigos del Bable convocó ente 1975 y 1980- con una traducción de Platero y yo, de Juan Ramón Jiménez.
L'Enriqueta González Rubín de narrativa pa mozos menores de 30 años va tar dotáu con 3.000 euros y la publicación de la obra ganadora. El gallardón debe'l so nome a la escritora que principió'l xéneru narrativu na lliteratura asturiana.
Enriqueta González Rubín nació en Santianes del Agua (Ribeseya) en 1832 y morrió en L'Infiestu en 1877. Fermín Canella informa de qu'en 1864 publicó una novela per entregues na prensa de la dómina, que nun apaeció. Coles mesmes, en 1875 publicó la novela Viaxe del tíu Pacho el Sordu a Uviedo, la primera que se conoz n'asturianu. Tamién dexó otros dos rellatos publicaos, dellos testos y dellos poemes, pero se desconoz el conxuntu de la so obra.
Per otru llau, Cultura yá convocó los premios lliterarios n'asturianu, que xuben la so dotación económica al pasar de 5.000 a 6.000 euros, y prepara la convocatoria de los gallardones Camaretá al Meyor Cantar y Nel Amaro de Teatru Profesional, informa Europa Press.