Micky, José Manuel Tejedor, Herr Manos o Axolotes Mexicanos son dalgunes de les propuestes
16 ago 2021 . Actualizado a las 11:13 h.La música en directo va ser protagonista esti branu na Terraza de la Llaboral, en Xixón. Cantares de siempre, indie pop, el folk más tradicional o'l rock de raigaños americanos van dase cita ente'l 12 d'agostu y el 12 de setiembre nesti espaciu singular de Llaboral Ciudá de la Cultura que va acoyer un total de 15 conciertos. Llaboral Ciudá de la Cultura ye un equipamientu dependiente de la Conseyería de Cultura, Política Llingüística y Turismu y xestionáu pola Sociedá Pública de Xestión y Promoción Turística y Cultural del Principáu d'Asturies.
El xueves 12, Micky, un colosu que forma parte de la hestoria de la música pop española, xúntase a los veteranos Los Linces pa ufiertar los cantares más emblemáticos d'una dómina dorada. José Manuel Tejedor, el gaiteru más gallardonáu y solicitáu del Principáu d'Asturies, va facer una repasada a la so carrera'l vienres 13 y el sábadu 14, el cantante y compositor asturianu Luis Nuñez va presentar, xunto con Los Folganzanes, el so últimu proyectu Blinca.
Doble sesión musical el vienres 20 d'agostu coles actuaciones de Herr Manos, proyectu con base punk de los hermanos Moriz y Ike Wahl, y Fernández, un tríu con ramalaes de rock noventeru y grunge que va aprovechar la ocasión pa presentar el so acabante estrenar EP, Soy un dragón. Tamién van presentar discu los abanderaos del indie pop nacional Axolotes Mexicanos. :3 ye'l tercer LP d'esta banda qu'estrume a xeitu les sos principales influencies que van dende'l J-pop, al pop punk o'l hiper pop.
Chica Sobresalto (Maialen) apruz con fuerza nel panorama musical cola salida de Sinapsis, el so nuevu discu, que va presentar na Terraza de la Llaboral el xueves 26 d'agostu n'un electrizante directu. El vienres 27, el compositor y cantautor Pancho Varona va cuntar, nun conciertu intensu, les hestories de toos esos cantares que compunxo pa Sabina, Luz Casal o Ana Torroja y Las Malvinas van llegar el sábadu 28 con una bien interesante amiestu de pop y punk nuevaolero. Cierren el mes d'agostu, el domingu 29, les actuaciones de José Martínez Álvarez, col so proyectu en solitariu Ún de Grao, y Dead Bronco que van presentar les temes del so últimu trabayu The Annunciation.
La frescura y el underground más contemporaneu van llegar el sábadu 4 de setiembre a la Terraza de la mano de los zaragozanos Fresquito & Mango y los asturianos Delagua van tornar a la Llaboral el domingu 5 con Animalías, el proyectu musical col que reivindiquen la orixinalidá, la guapura de lo distinto, la rotura de los cánones impuestos y la vuelta al orixe y a la esencia. Tamién el domingu va tener llugar l'actuación de Jorge Colsa y Gema Bravo, una propuesta cosmopolita que fomenta la igualdá y la diversidá, al traviés d'una multifusión d'estilos musicales de raigañu con xiros mestizos.
Los valencianos Valira presenten el sábadu 11 el so últimu discu Supernova, dolce cantares de pop rock independiente a les que se-y suma un componente melódicu sellu indiscutible de la banda. Cierra'l ciclu de conciertos de branu na Terraza, el domingu 12, l'actuación de Tere Rojo & Charly Blanco que van ufiertar al públicu cantares de siempre con un toque bien personal.
Les entraes pa tolos conciertos yá tán a la vienta, con descuentu pa socios el Club Cultura Asturies y usuarios del Pasaporte Cultural, na Recepción de la Llaboral, nel Centru d'Información Turística del Principáu d'Asturies (CITPA) n'Uviéu, nel Centru Niemeyer n'Avilés y na web de la Llaboral, onde se va comunicar cualquier cambéu na programación.