La ética cristiana nun pue aceptar la pederastia na ilesia

AGORA

21 ago 2022 . Actualizado a las 05:00 h.

Ello ye que’l párrocu del conceyu de San Pedro (Albacete), Óscar Carbayo, dixo na homilía qu'ofició'l  domingu pasáu que les pareyes homosexuales nun son «queríes por Dios«». Añedió tamién que «tamos siendo adoctrinaos y qu’hai munches coses que sabemos que, dende la ética cristiana, nun puen ser aceptaes». Nun me choca que los vecinos de San Pedro denunciaren que «el sermón foi un ataque grave a la convivencia ente persones» mentanto que dellos colectivos dicen que pronunció un discursu d’odiu escontra la dignidá de les persones LXTBI. Per otru llau, va tiempu qu'otros miembros de la Ilesia, como l’obispu de Tenerife Bernardo Álvarez, manifestaron que la homosexualidá ye pecáu mortal, dalgo que provocó un gran discutiniu qu’a lo cabero tuvo pocu recorríu.

El casu ye que’l que fuere númberu 1 de Vox por Albacete, aparte de negar l'holocaustu tamién fizo comentarios homófobos: «Si'l mio fíu dixere que ye gai, trataría d'ayudalu. Hai terapies pa reconducir la so sicoloxía». A lo cabero dimitió, anque la formación d’ultraderecha faló d’altura de mires y xestu patrióticu. Vox tamién considera ciudadanos de segunda al colectivu LXTBI: «defendemos el matrimoniu tradicional ente home y muyer», espunxo Abascal en más d'una ocasión refugando d'esta manera al matrimoniu igualitariu, derechu que se llogró n'España en 2005. Pero nun ye la so única afirmación con tintes homófobos, tamién s'escandalizaron cuando la católica Irlanda  aprobó’l  matrimoniu gai; paez-yos qu’Occidente va como un sonámbulu a un precipiciu.

Les declaraciones de los miembros de Vox, y como non del párrocu d’Albacete, son enforma peligroses porque creen un clima poco favoratible pa esti colectivu. Tando asina les coses, la Oficina pola Non Discriminación (OND) abrió dellos espedientes nos seis primeros meses de 2022 nel ámbitu de la LXTBI-fobia y casi nel 30% de los casos atentóse contra la integridá física de persones.

Con toa seguranza, el parrócu d’Albacete paez que nun ta preparáu pa dar nenguna homilía más y nun sé si, pa siguir siendo sacerdote, al menos debería dir a cursos de formación pa conocer fondamente la pederastia na Ilesia, delitos que nun salíen a la lluz porque les víctimes de los abusos nun queríen facelo público porque-yos daba vergoña y nel obispáu resolvíen el problema cambiando al cura de parroquia, lo que provocaba que volvieren otra vuelta a repetise estos terribles actos pese a l'amonestación y a la promesa de que nun diba volver facese. ¿Por qué los cures nun falen d’estos delitos nes homilíes? Con toa seguranza ayudaríen a acabar con esta situación. Hans Zollner, un xesuita alemán, sicólogu y teólogu, profesor de la Pontificia Universidá Gregoriana y miembru de la Comisión Pontificia pa la protección de menores, instituyida pol Papa Francisco, tien l’encargu d'un llabor bien necesariu: estudiar y desaniciar los abusos sexuales y la pederastia. Lo malo del casu ye que-y paez que la plaga de los abusos sexuales de los sacerdotes va pa llargo, al menos una xeneración, hasta la so desapaición. Hans camienta que la Ilesia tien que «ufiertar una formación humana, emotiva y sexual, yá que ye sobremanera un abusu de poder de daquién que nun tien la fuerza física nin mental pa refugalu». Diz qu’una vida célibe insana pue ser «un factor de riesgu». Per otru llau critica que dellos aspirantes al sacerdociu entraben al seminariu «porque esperimentaben que yeren homosexuales y creíen que podíen convivir meyor nuna vida célibe, pensando que se produciría una solución máxica cola ordenación sacerdotal». Ta convencíu de que «hebo poca seriedá na selección de sacerdotes». Son sangrantes los casos de prelaos irlandeses, austriacos, belgues y alemanes que taparon, defendieron o xustificaron, o practicaron la pederastia, por nun falar de 3000 cures franceses qu’abusaron de 330.000 víctimes. El mes pasáu en Portugal la comisión portuguesa qu’estudia abusos sexuales a menores nel senu de la Ilesia Católica tuvo que pidir ayuda al parllamentu lusu pa facilitar que les víctimes en situaciones más vulnerables puean denunciar. Casos asina hailos per tol mundu, como en México, que cuenta con una llarga hestoria de pederastia per parte de miembros de la Ilesia, onde según la Conferencia del Episcopáu Mexicanu (CEM), 426 sacerdotes fueron investigaos por pederastia na última década. Unu de los más célebres foi’l producíu pol fundador de la orde de los Llexonarios de Cristu. Y si falamos de Canadá, la Ilesia Católica tuvo que vender más de 40 propiedaes pa facer frente a les demandes por abusos n’internaos.

El xuez que dirixó la investigación de la pederastia n’Irlanda diz qu’agora, que paez que la Ilesia ta abierta a la investigación d’estos casos n’España, tien que buscar la forma pa llamar a declarar a los responsables de permitir los abusos nos relixosos, un llabor que sabe que va ser «complicáu» al nun tener «el poder de la llei y de los tribunales». Per otru llau, l'auditoría de la Ilesia española detecta polo menos 30 alcuerdos secretos con víctimes de pederastia y pagos d'hasta 50.000 euros. Amás, la práctica de treslladar al estranxeru a cures acusaos d’abusos a menores sigue siendo corriente nes últimes dómines na Ilesia Católica, mentanto qu’hai sospeches d‘una canal internacional pa facilita-yos la fuga, con una conexón n'España, según revela una investigación conxunta de El País y Report München.

Tenemos que recorda-y al párrocu d’Albacete y a los que piensen como él, qu’estes práctiques de pederastia de relixosos y el so encubrimientu pola Ilesia son les que nun son «queríes por Dios» y aparte de ser xulgaos en tolos países del mundu, más nuna democracia como n’España. Son les que tienen que ser motivu de reflexón en tolos ámbitos, como non, también nes homilíes.