El cineasta asturianu va competir na sección Albar tres recibir el premiu del xuráu en 2018 por «Cantares de una revolución»
24 sep 2024 . Actualizado a las 05:00 h.Retaguardia, l'últimu trabayu del reconocíu cineasta asturianu Ramón Lluís Bande, va tener la so premiere internacional en FICMonterrey esti vienres y va estrenase n'España na Sección Oficial Albar del 62 FICX. Tres llograr en 2018 el Premiu Especial del Xuráu con Cantares de una revolución, Ramón Lluís Bande compite nesta ocasión xunto con cineastes como los yá anunciaos Bruno Dumont, Claire Simon o India Donaldson.
Col rigor documental que caracteriza al so autor, Retaguardia trata de reconstruyir una colección de películes que pudieron rodase n'Asturies mientres l'añu 1937 ya imaxina un posible cine de propaganda que, impulsáu dende les instituciones y les organizaciones políticu y sindical republicanes asturianes, pudo desenvolver l'equipu periodísticu del diariu socialista Avance. El cineasta y ensayista asturianu sofítase, nesta ocasión, nes series de fotografíes de Constantino Suárez y los testos d'Ovidio Gondi, Juan Antonio Cabezas o Juan Manuel Vega Pico.
El Festival tamién va cuntar na so sección FICX Premiere col estrenu n'España de Monstruo de Xibalba. La ópera prima como directora de la cineasta mexicana Manuela Irene, que tuvo'l so estrenu mundial nel Festival Internacional de Cine d'Edimburgo y que tamién se proyectará mientres el certame mexicanu FICMonterrey, llogra conxugar aventura y reflexones de caláu esistencial de la que s'enfota nel misteriu de la lleenda maya poles selves de Yucatán y acompaña a un neñu obsesionáu cola muerte.