Riaño: «El modelu d'oficialidá va ser socialmente aceptable y mui rentable culturalmente»

Xosé Antón González Riaño (Viella, 1956) ye maestru, pedagogu y Profesor Titular de la Universidá d'Uviéu, institución na que se doctoró en 1993. Dende fai dos años ye presidente de l'Academia de la Llingua Asturiana, institución onde ocupó tamién munchos años la vicepresidencia, y de la que ye miembru de númberu dende 1987. Polo tanto, na actualidá ye una de les voces más autorizaes pa falar de la oficialidá y de lo que supón.

-¿Asistimos a un relevu xeneracional na defensa de la llingua asturiana?

-La evolución ye enorme, en cuanto al interés y les actitúes de la xente. El sector de la mocedá ye clave. L’Academia fizo un estudiu sobre la mocedá asturiana y la llingua asturiana y los resultaos sobre la implicación de la mocedá na llingua son espectaculares. Ellí onde los datos sociolóxicos falen d’un porcentaxe mayoritariu, del 53%, favorable a la llingua, cuando falamos de la mocedá, ente 16 a 29 años, pasa al 80%. La influyencia de la mocedá asturiana ye determinante. Esi sector ye’l qu'inclina la balanza a favor del asturianu. Y per otru llau, tenemos los meyores escritores, músicos, la xente más dinámico. Ye xente mui venceyao a la cuestión llinguística.

-¿Y a qué atribúi esta mayor implicación o sensibilidá de los mozos cola llingua? 

-Parten d’una situación na que desapaecieron los prexuicios de que l’asturianu yera un dialeutu, yera falar mal. A lo llargo de estos 40 años nosotros ellaboramos un discursu socialmente convincente. La mocedá acoyó con enfotu esti discursu a favor de la llingua y la cultura n’Asturies, que nós mesmos fuimos ellaborando con investigaciones, con estudios, con llibros, con artículos. La causa ye esta. La mocedá ye tradicionalmente una mocedá mui progresista y vencéyase la cuestión de la llingua y la cultura con una percepción progresista moderna, anovadora, de lo que tien que ser Asturies.

-Sicasí, esti resurdir del asturianu nun paez sofitáu nel sistema d'enseñanza.

-Ye cierto, el casu de la educación secundaria y bachilleratu ye un casu de esceición alministrativa, la cuestión ta mal plantegada, porque nun ye una materia voluntaria, sinón optativa, que compite con otres materies optatives, de tal mou que toes compiten  con toes. Por cierto, la Lley d’Usu diz que ye una materia voluntaria, non optativa. El problema del asturianu en Secundaria ye un problema d'encaxe alministrativu y d'allegalidá. Na educación Primaria ye un problema de planificación llingüística. Nun se cumple'l mandáu estatutariu de promover la enseñanza. Lo que se fai ye ufiertar, pero nun promover. Promover ye falar a los padres de les ventaxes de falar n’asturianu, como razonamientu matemáticu, conocimientu del mediu, etc. Da la sensación de que l’alministración asturiana conténtase con dicir: ehí lo tenéis, coyéilo si lo queréis, pero nun lo coyáis muncho porque tengo poques perres pa tantos profesores. Polo tanto, nun se promueve. Si na Conseyería d’Educación hai instrucciones clares de promover la enseñanza del asturianu, dende llueu subiría como’l restu de les materies.

-Nesta última llexislatura hubo un departamentu específicu, una Dirección Xeneral de Política Llingüística.

-Sí, pero la dirección xeneral siguía directrices de la presidencia del Gobiernu. Nun pongo en dulda la valía y l’interés del conseyeru y del director xeneral pero toos sabemos que les llinies de planificación política dependíen de la implicación y de la llinia ideolóxica del presidente. Yo, del presidente, tengo una bona opinión personal, paezme una persona intelectualmente mui potente, pero llamento que nun entendiera enxamás  la importancia cultural y social del asturianu.

-Agora ábrese otru escenariu bien distintu. ¿Cómo encara esta nueva llexislatura?

-Yo soi mui optimista. Adrián Barbón tien les idees mui clares sobre la política que necesita Asturies en xeneral, pero tamién sobre la política llingüística y cultural. Y nun ye un optimismu militante obligáu, non. Paezme que ye una persona mui capacitada, qu'escuchó a muncha xente. Xeneracionalmente nun tien nada que ver, ruempe dafechu colo que foi'l socialismu asturianu dende la transición política hasta güei. Hai idees nueves, perspeutives nueves, y una visión d’Asturies muncho más ilusionante, decidida, y espero grandes coses dende’l puntu de vista polítiucu, cultural y llingüísticu, podemos tener la suerte de cuntar con un gran presidente rexonal p’Asturies.

 -¿Vamos ver la oficialidá nesta llexislatura?

-Ta claro que les fuerces con representación parllamentaria favoratibles de la oficialidá son mayoritaries. A lo llargo d’esta llexislatura van dase les condiciones de consensu políticu como pa entamar el procesu de reforma del Estatutu que lleve a la Oficialidá. Eso va dase a lo llargo de la llexislatura, pero la política llingüística hai que facela dende'l primer momentu, porque ye rentable p’Asturies. Y tenemos un marcu llegal que permite facer política llingüística.

 -¿Y qué puede facese dientro d'esti marcu llegal? Ponga dalgún exemplu.

-Hai tres ámbitos fundamentales nos que se puede facer una política llingüística que sedría perfeuta pa que la oficialidá resultare muncho más natural y cenciella.

L’ambitu educativu. Nada impide que se llogre’l reconocimientu de la especialidá docente pal profesoráu de Primaria y Secundaria. Si reciben la mesma formación universitaria tienen que tener les mesmes posibilidaes que’l restu de los profesores. Tien qu’haber concursos-oposición y de tresllaos por llingua asturiana. Esi ye un elementu que se puede llograr sobre todo teniendo en cuenta que n’Asturies y en Madrid va haber una alministración socialista, y el decretu d’especialidaes depende de Madrid. La especialidá docente ye irrenunciable nesta llexislatura. Hai que cumplir l’Estatutu d’Autonomía y la Llei d’Usu. hai qu’asegurar la presencia del asturianu normal nos centros de la privada-concertada y de la privada. Hai qu’actuar nesi ámbitu asegurando la enseñanza del asturianu nesos centros igual que na rede pública. Hai que promover la enseñanza del asturianu porque ye beneficiosa pa los escolinos.

L’ámbitu de los medios de comunicación. Ye irrenunciable una presencia digna del asturianu na RTPA. Les coses que se tán faciendo son populares y pa mi mui importantes, porque conecten cola población asturiana. Pero necesitamos otru elementu de dignificación más urbanu y eso pasa por espacios informativos n’asturianu. Nós, venimos pidiendo qu’unu de los informativos seya n’asturianu, eso tien qu’acompañase con otros espacios deportivos, magacines, musicales, etc. n’asturianu. Y nesti ámbitu de los medios de comunicación, qu’un periódicu cola trayectoria de la cabecera de LA VOZ DE ASTURIAS incorpore l’asturianu a la so páxina principal, na portada, ye pa felicitar la iniciativa y ye un exemplu de lo que se puede facer.

Otru ámbitu ye l’institucional, de la visualización institucional del asturianu na Xunta, nel Gobiernu, nes conseyeríes, nes páxines web, nes informaciones, etc.. L’asturianu tien que visualizase nel ámbitu institucional. Hai munches cuestiones que se pueden facer, fundamentalmente nel ámbitu escritu. Tener formularios mínimos, etc. Yá lo fai la Universidá dende la época de Gotor, tener la páxina web n’asturianu cola información mínima. Esi modelu ye’l qu’hai qu’importar pa la Xunta, conseyeríes, etc.

-¿Y l’ambitu cultural?

-Esi ye otru elementu que tenemos que potenciar munchísimo, ye un lluxu p’Asturies tener la calidá d’escritores y músicos asturianos. Ye un lluxu tener la xeneración cultural que tenemos y que n'otres comunidaes entamen a valorar, por exemplo en Cataluña entama a conocese agora la lliteratura n’asturianu. El rock y el folk asturianos tamién son conocíos en Cataluña, nel País Vasco, en Valencia… La música y la lliteratura n’asturianu, dende 2008 y dende 2011 ta desprotexida y ye llamentable porque tenemos unos creadores que nun se corresponden con una demografía d’un millón d’habitantes, son d’una calidá esceicional.

-Pueden ser embaxadores de la llingua nel exterior.

-Efeutivamente. La imaxe d’Asturies tien dellos referentes, hai una cuestión que nos beneficia como ye’l paisaxe, pero tan tamién la música y la lliteratura que tien que presentanos ente’l mundu como una comunidá viva, solidaria, inclusiva, pero con una personalidá propia que se fue consolidando a lo llargo de los sieglos. Eso ye lo que la xente quier ver de nosotros.

-Un pasu importante ye'l decretu que fixa los niveles de competencia de la llingua asturiana según el marcu européu, podemos dicir que ye posible'l ‘first’ n’asturianu.

-El decretu de niveles llingüísticos según el marcu européu ye unu de los llogros de la política llingüística más importantes nesta llexislatura qu’acaba. Fai que’l asturianu seya una llingua más europea. Ye un gran pasu na dignificación, igual que tamién lo ye la  esperiencia d'inmersión llingüística parcial n'asturianu, el plan pilotu.

-¿Aludía a que s'acabaron los prexuicios. ¿Ta perdiéndose'l mieu a falar abiertamente n'asturianu?

-Sí, pero los estudios dicen qu’hai un sector de la población asturiana que ye minoritariu y que tien un reflexu políticamente, que puede andar al rodiu del 15% o 20%, que ye mui refractariu a cualquier procesu de dignificación de la llingua y de la cultura. Va poco tuvo aquí n’Asturies un políticu gallegu que entamó na época de Fraga la política llingüística, y decíanos que tamién en Galicia teníen un sector d’un 15% contrariu a la llingua gallega, pero esi sector nun ye’l sector dirixente. Da la sensación de qu’equí, n’Asturies, esi sector tovía ta mui bien asitiao y exerce un papel mui negativu en cuanto ve les posibilidades de oficialidá.

-Pero paez que nos últimos años, na última década, se visibiliza más la xente partidario del asturianu que los detractores.

-Sí, porque ellaboramos un discursu que socialmente ganó, y agora ye muncho más difícil caltener una posición argumentada escontra la dignificación d’una llingua y una cultura que nos definen como pueblu. Agora bien, esos sectores minoritarios tán amatagaos y nun actúen con argumentos, actúen con influyencies y xeneren oposiciones n’estamentos clave na sociedá asturiana, n’estamentos de prestixu. El nuestru 15% sigue calteniendo poder.

 -Agora que comenta la tema de Galicia, ¿cómo s'entiende la posición del PP equí n’Asturies?

-La posición del PP ye puramente táctica, nin siquier ye una posición estratéxica, porque nun ta argumentada. Ye una posición táctica que plantega que nel so sector de votantes, posiciones contraries a la llingua y la cultura pueden ser rentables. Dempués ye mentira, los estudios sociollingüísticos dicen que la cuestión favorable a la llingua ye tresversal. Pero coyunturalmente consideren que fidelicen más a los sos votantes calteniendo una posición contraria a la dignificación llingüística y cultural n’Asturies. Eso choca porque a finales del sieglu XX cuando se plantegó la reforma del Estatutu d’Autonomía, les posiciones más a favor de la oficialidá y de la busca del consensu veníen per parte del PP, por tanto nun ye una cuestión de estratexia, ye una posición coyuntural táctica pero políticamente equivocada. Nun van tener más llogros por tener esa posición antiasturiana, y les elecciones van afitándolo.  El PSOE qu'históricamente dio un xiru fundamental a favor de la llingua y la cultura, tuvo unos resultáos eleutorales esceicionales. Nel PP los que defendemos la cuestión llingüística tenemos munchos amigos y saben que tamos a la so disposición y yo toi seguru que nel PP va dir afayando esta posición táctica en posiciones d’equilibriu, respetu y d'acuerdu na cuestión llingüística, que ye de lo que se trata.

-¿Qué va ver Asturies cola oficialidá?

-N’Asturies llevamos 40  años dende la creación de l'Academia Asturiana, llevamos 35 años col asturianu nel sistema educativu, más de 30 años faciendo midíes col asturianu. Tenemos gran esperiencia pa facer que la oficialidá seya una realidá n’Asturies bien pensada, bien asumida socialmente y dende llueu creo que puede ser un modelu d’oficialidá afayáu a la nuesa situación, que nun tien por qué replicar los modelos d’otres comunidaes, sinón que tien que tar pensada como una solución  cultural p’Asturies con implicaciones sociales positives y con niveles d'aceptación.

-Una oficialidá “amable” como diz el nuevu presidente.

-Eso preguntábenmelo fai poco y yo respondí: caro que la nuesa va a ser una oficialidá amable, nun va a ser repunante. Nosotros queremos facer midíes que se perciban como un bien social p’Asturies, que seyen plantegaes en fases de fácil aceptación, col máximu nivel de consensu posible. Y toi seguru de que nós, dempués de más de 40 años, sabremos facer una oficialidá que tenga repercusiones culturales, que seya un elementu de dinamización  n’Asturies y toi convenciu de que lo faremos bien. Otres esperiencies n’otres comunidaes partieron de cero. Fadremos un modelu socialmente aceptable y culturalmente mui rentable.

---

---