Estes seis empreses asturianes son finalistes nun programa nacional d'anovación

Cinco compañíes nueves y la fundación Idonial llegaron a la final

Borja Sánchez y Cristina Fanjul
Borja Sánchez y Cristina Fanjul

Cinco empreses asturianes nueves y la fundación Idonial llegaron a la final na tercer edición del programa nacional Ances Open Innovation, que busca xenerar negociu ente grandes sociedaes tractores y pequeñes firmes de base tecnolóxica.

Nesti proyectu, entamáu pola Ances baxo la coordinación de Cristina Fanjul, vicepresidenta de la entidá y directora de CEEI Asturies, participen nueve compañíes españoles líderes nos sos sectores.

Les firmes tractores participantes nesta edición del programa d'anovación abierta enmárquense nos ámbitos agroalimentariu, biotecnolóxicu, construcción ya industrial, cola presencia de dos empreses asturianes: Capsa Vida (Central Lechera Asturiana) ya Informática El Corte Inglés.

El restu de participantes son Abbot, Aceites Cormorán, Sacyr, Skf, Soltec, Symborg y Tereos.

Los retos que plantegaron tienen que ver con intelixencia de datos (big data), loxística, alimentación saludable, amenorgamientu de zucres, movilidá, datos, circularidá, salú, conversión de residuos, ganadería, sostenibilidá ambiental, dixitalización, analítica, drones, robótica industrial, sensórica, sistemes de peñeráu de fluyíos, diseñu d'equipos, inxeniería, sonda microbiana y cancelación de ruiu industrial.

A la convocatoria presentáronse 87 propuestes de toa España y a la fase final llegaron 24 candidates, ente les que s'atopen les seis asturianes: Abamobile, Hidritec, Táctica TIC, Sens3r, Soar-Ingeniería y la fundación Idonial, que desenvolvieron propuestes pa les compañíes Aceites Cormorán, Capsa Vida, Sacyr y SKF.

Les empreses nueves prepárense pa competir na final, que se va celebrar virtualmente'l 24 de setiembre, n'abierto, a les 11:30 hores.

El premiu son 500 euros y la posibilidá de caltener una rellación empresarial ente firmes.

Comentarios

Estes seis empreses asturianes son finalistes nun programa nacional d'anovación

Cola ayuda de