Cultura trabaya nun corrector ortográficu al asturianu y nun traductor al gallego-asturianu
ACTUALIDÁ
Va ponese en marcha'l premiu de testos teatrales Pachín de Melás y la cátedra universitaria María Josefa Canellada
15 dic 2022 . Actualizado a las 12:18 h.La Conseyería de Cultura, Política Llingüística va poner en marcha nel 2023 la versión actualizada del traductor castellanu-asturianu Eslema.2, que va poder usase dende los teléfonos móviles. Amás, van principiar a trabayar nun corrector ortográficu automáticu y va siguir trabayándose nel traductor al gallego-asturianu, d'esta vuelta dende dientro de la propia Dirección Xeneral.
Otra manera, nel 2023 va ponese en marcha'l premiu Pachín de Melás de testos teatrales y va dase un impulsu a los estudios de llinguaxe alministrativu n'asturianu y a les publicaciones en gallego-asturianu, al menguar la edición de llibros nesti idioma nos últimos años.
En xunto, la promoción del asturianu suma 2.535.701 pal 2023, un 48,84 % desde 2019, lo que supón «la xuba porcentual más grande nuna llexislatura en tola serie histórica de Política Llingüística», indicó la conseyera Berta Piñán, que señaló qu'esti aumentu ye «una prueba evidente del compromisu d'esti Gobiernu, y en particular de la mio Conseyería, cola llingua asturiana».
Piñán compareció esti xueves na Xunta Xeneral, onde presentó les cuentes de la so cartera. En Política Llingüística hai «una continuidá na llinia presupuestaria abierta nel 2022, que tien como exes centrales promover alcuentros en favor de la normalización sectorial». Asina, van siguir alantre festivales como'l Reguerada Fest, Xuntoiro o les actividaes de la Casina de la Traducción.
Dende la Dirección Xeneral de Política Llingüística quieren comprometer a otros organismos de l'alministración nel fomentu del usu de la llingua asturiana. Otra manera, hai una xuba de 38,61% na dotación a la Universidá d'Uviéu, p'ayudar a la puesta en marcha de la Cátedra María Josefa Canellada, de creación nueva, dedicada a los estudios asturianistes.
Amás, van crease dos servicios de normalización municipales nuevos, va estendese a un númberu mayor de conceyos los cursos del proyectu Falamos, el plan d'enseñanza non reglada d'adultos, y van crease dos llinies de subvenciones pa la promoción d'actividaes n'asturianu, una destinada a empreses, dotada con 70.000 euros, y otra a asociaciones, que va tener una dotación de 50.000 euros, informa Europa Press.