Anabel Santiago y Eva Tejedor & Les Pandereteres protagonicen la tercera edición d'Amosando

La Voz

CON C DE CIENCIA Y CULTURA

Conciertos Amosando, Anabel Santiago, Eva Tejedor

Xixón acueye'l 9 de payares una nueva grabación d'esti ciclu de conciertos en formatu íntimu, grabaos y emitíos per Internet

06 nov 2019 . Actualizado a las 09:19 h.

Tres el pasu per Amosando de  L-R, Xaime Martínez, Ún de Grao y D’Urria, lléga-yos la vez a dos de les muyeres más reconocíes de la música asturiana, Anabel Santiago y Eva Tejedor. Coles sos actuaciones van pesllar el sábadu 9 de payares la edición 2019 d'esti ciclu de presentaciones de discos entamáu por musicasturiana.com, con un formatu ente conciertu acústicu con aforu reducíu, programa de televisión y alderique; too ello retresmitíu per Internet pa que llegue a persones de tol mundu. 

 Anabel Santiago va presentar Y_Andá, un discu -l'octavu de la so carrera- onde esta renovadora de la canción asturiana vuelve a innovar y lleva la so propuesta al ámbitu de la música electrónica y del pop, calteniendo tamién los raigaños de la tradición sonora asturiana. Pela so parte, Eva Tejedor & Les Pandereteres van presentar el so primer álbum L’Entamu. Nel so nuevu proyectu, esta veterana artista folk entemez temes de composición propia xunto a reelaboraciones de pieces tradicionales, dando como resultáu unos cantares enllenos de calidá y qu'abren nuevos caminos sonoros dientro de la música protagonizada pola pandereta y otros instrumentos tradicionales de percusión.

La ciudá de Xixón va acoyer esta grabación a les 18.30 hores d'esti sábadu 9. La entrada ye de baldre pero ta llendada a les 20 persones que ganen una invitación participando nun sorteu al traviés de les redes sociales de la tienda online y distribuidora dixital musicasturiana.com, organizadora del eventu xunto col realizador audiovisual Javier Lueje y la productora Goxe Producciones. Amosando tien el patrociniu de la estaya de Turismu del Conceyu de Xixón y de la Fundación Caja Rural de Asturias. 

Conciertu Ún de Grao

Amás de la convocatoria d'esti conciertu/grabación, musicasturiana.com publicó apocayá'l videu del conciertu completu y de la entrevista con Ún de Grao presentando Pelo Segao, trabayu que lleva a la tonada hacia soníos propios del rock, del jazz o de la bossa nova. Los videos de D’Urria -los otros protagonistes de l'anterior edición d’Amosando- presentando En Ca Pla van publicase a mediaos d'esti mes.