Nueche de San Xuan de fueu y d'agua

L'orixe de dalgunes tradiciones del solsticiu de branu cola foguera como centru ritual

Foguera de San Xuan d'Uviéu
Foguera de San Xuan d'Uviéu

El Solsticiu de Branu, recristianizáu como Nueche de San Xuan, cellébrase n’Asturies colos bailles alredor de la foguera y colos saltos purificadores que tienen el poder de curar y evitar los maleficios o más modernamente na nuesa cultura'l de cumplir deseyos. 

Tratábase de celebrar el fenómenu astronómicu pa da-y "fuercia al Sol", yá que dende esos díes diben siendo menos les hores de lluz. Tamién esta nueche tien el nome de “nueche les trastaes” nes parroquies rurales. Los más mozos faen bromes, cafiantes delles vegaes, como quitar les portielles, cambiar los preseos de sitiu, esconder los tiestos o, inclusive, descolgar les campanes de la ilesia. Como esto último requier maña y muncha fuerza, la trastada más habitual ye la de forrales con trapu pa que, al día siguiente, metanes la procesión, nun toquen.

 El centru ritual d’esta nueche ye la foguera, na que se quema simbólicamente tolo que representa’l pasáu, lo escuro, lo frío. Ye por eso polo qu’en dalgunos llugares quémense los trastos inservibles que fueron acumulándose demientres l’añu.

Alredor d’esta foguera báillase la “danza prima”, conxuntamente homes y muyeres enllazaos, en círculu, xeneralmente, col fueu como centru. El so ritmu vien marcáu por un antigu y llargu romance mui repetitivu, cantáu por un home -o güei también por una muyer- al que tolos danzantes arrepostien a coro. La lletra la danza prima ye mui asemeyada en tolos sitios, anque apaecen diferencies, motivaes, ensin duldia, pol usu que d’ella fixeran les xentes dende la remota antigüedá. Báillase la danza prima en sen contrariu a les aguyes del reló (escontra'l pasáu), y la foguera tien de saltase un númberu impar de vegaes

 N'Asturies hai gran bayura de ritos rellacionaos con esta folixa. Amás la foguera, también ta el ritu l'enramáu la fonte pa les xanes, cuayada (pa que coman los xaninos), una aguya (pa que la xana cosa col so filu d'oru) y un tortu, pa que coma. El poner el ramín de trébole nel balcón la namorada. Coyer la Flor del Agua, xeneralmente se coyía de la rosada, nos praos. Y nun pue faltar el güevu de San Xuan que revela'l futuru.

Valora este artículo

8 votos
Comentarios

Nueche de San Xuan de fueu y d'agua