El Centru Niemeyer viaxa a Roma al traviés de la fotografía

Una esposición axunta obres de catorce autores contemporáneos con semeyes del artista Gregorio Prieto


Catorce fotógrafos españoles contemporáneos reconocíos pola so calidá artística amuesen les sos obres nel Centru Niemeyer na esposición El viaxe a Roma. Fotógrafos becarios na Academia d'España en Roma, que va poder visitase hasta'l 29 de setiembre. L'amuesa, inaugurada ayeri, toma como referencia les imáxenes de Gregorio Prieto y Eduardo Chicharro, los primeros artistes qu'encetaron la fotografía na Academia d'España en Roma.

Comisariada por Rosa Olivares, la esposición axunta pieces de Paula Anta, Juan Baraja, Nicolás Combarro, Naia del Castillo, Julio Galeote, Germán Gómez, José Guerrero, David Jiménez, Aitor Lara, Jesús Madriñan, Fernando Maquieira, José Noguero, Jorge Yeregui y Begoña Zubero. Toos estos artistes conformen un conxuntu d’autores que güei constitúin la primer llínea de la fotografía española.

L'oxetivu ye que’l públicu pueda ver lo que güei se fai n'España nel ámbitu de la fotografía y enseñar cuál ye'l puntu d'entamu d'esta disciplina, al traviés de la mirada de Gregorio Prieto (Valdepeñas 1897-1992) xunto con Eduardo Chicharro (Madrid, 1905-1964), becarios d'esta institución ente 1920 y 1930.

Naturaleza, fábules y lleendes, arquitectura, territoriu, ciudá, figures y llirismu son dalgunos de los elementos presentes nesta esposición, que recuerda al públicu qu'en Roma sigui esistiendo un llugar máxicu que forma a artistes españoles.

Dende la so creación en 1873 l'Academia d'España en Roma desempeñó un papel fundamental na formación de diverses xeneraciones d'artistes ya intelectuales españoles. L'Academia d'España en Roma sigue siendo güei día esencial na política cultural esterior española.

Valora este artículo

7 votos
Comentarios

El Centru Niemeyer viaxa a Roma al traviés de la fotografía