Nel focu del fotoperiodismu

El certame de Siero concede'l primer premiu a Manu Brabo y galardona semeyes sobre nacionalismos, refuxaos y contra la violencia de xéneru


El Conceyu de Siero acaba de fallar les obres ganadores del premiu de fotoperiodismu 2019, trés semeyes de profesionales que capten distintos momentos de temes qu'interesen a la sociedá actual: estremismos políticos, refuxaos y violencia machista.

Una semeya ensin títulu de Manuel Varela de Seijas «Manu Brabo» ye la ganadora del primer premiu, que ta dotáu con 2.000 euros. Na fotografía apaez un miembru del grupu nacionalista ucranianu d'estrema derecha "C14" glayando slogans en favor de la unidá d'Ucraína mientras una manifestación de conmemoración pol 76 aniversariu de la nacencia de la UPA (Exercito Insurxente Ucranianu) fundáu en 1942 pa combatir al pie de l'Alemaña Nazi al exércitu Soviéticu, entós fuerza ocupante d'Ucraína. La fotografía ta fecha en Kiev el 15 d'ochobre de 2018.

Brabo (Zaragoza 1981)  tien nel so poder el Premiu Pulitzer, The British Journalism Awards, el Prix Bayeux- Calvados de reportero guerra o'l Picture of The Year International. Dende 2007 cubrió, como fotoperiodista independiente, revoluciones, conflictos, desastres naturales... en países como Libia, Siria, Iraq o Ucrania.

El segundu premiu, dotáu con 1.000 euros ye pa la semeya «Dilbrin», de José Manuel López Pérez. Na imaxe apaecen Dilbrin, de 29 años y los sos cinco fíos sentaos nun sofá en plenu campu de refuxaos de Serdasht, pertenecen a la minoría yazidí y tuvieron qu'abandonar los sos llares cuando los yihadistes del Estáu Islámicu tomaron la ciudá. El so home morrió nos combates.

José Manuel López Perez formó parte de los fotográfos de La Crónica de León hasta l'añu 2009 y dende entós trabaya como freelance documentando conflictos en países como Afganistán, Iraq, Palestina, Irán, Kosovo, Haití, Guatemala, Venezuela, Nagorno, Karabakh, y República Democrática del Congo ente otros.

El Premiu Especial Fotoperiodismu d'Asturies (dotáu con 600 euros) ye pa la semeya «Manos rojas contra la manada», d'Eloy Alonso González, fotoperiodista con una dilatada trayectoria que n’actualidá trabaya n’axencia Reuters pal Norte d’España, y que tien fotografíes publicaes en diarios internacionales.

El xuráu, qu'integraben los fotoperiodistes: Jesús Fernández Salvadores, Isabel Blanco Permuy y Joaquín Gómez sastre y presidío por Aurora Cienfuegos Prada, escoyó 42 fotografíes que se van amosar coles obres ganadores na Sala d'Esposiciones de la Casa de Cultura de La Pola Siero del 3 al 19 d'ochobre de 2019.

Valora este artículo

6 votos
Comentarios

Nel focu del fotoperiodismu