Hai abogaos de causes nobles, cruzaos de causes innobles, misioneros de causes mediocres, y depués ta Albert Rivera. La misión o cruzada del cabezaleru de Ciudadanos per Venezuela ye una d'eses aventures lliteraries que nun te descubren gran cosa del territoriu esploráu pero apúrrente infinidá de datos sobre l'esplorador. Rivera, esi Phileas Fogg del sentíu común, que n'ochenta hores trespasa tolos meridianos mentales y consigue volver de Venezuela ensin salir siquiera d'España.
Esta faceta esploradora de Rivera, ilusionante y novedosa, pue tener ciertu recorríu na industria del xuguete. De fechu, si dalgo tienen en común los líderes más nuevos de la política española ye la facilidá con qu'ún los imaxina en formatu de venti centímetros, colos brazos articulaos y la cabeza de goma y por supuesto sorrientes y sufríos, como los Madelman de los años setenta. Rivera paez especialmente aptu pa protagonizar una llinia d'artículos tipu Albert Astronauta, o Albert Submarinista, o Albert Pelegrín de la Democracia, pero nun toi mui seguru de que l'Albert Candidatu de Ciudadanos sía un productu demasiao vendible, a lo menos si se manda de táctiques como esta del Venezuela Freedom Tour que presenta, pamidea, un fallu importante y difícil de solucionar ensin neurociruxía.
Esta táctica dizlo too de lo que Rivera tien pensao pa la campaña electoral, a saber, que'l blancu ye Podemos. La elección del destín del viaxe respuende, inequívocamente, a la finalidá d'asociar a Podemos con Venezuela y, al trazar un panorama apavoriante de la situación de Venezuela, instalar na imaxinación del electoráu la posibilidá de qu'esi panorama sía l'español si gobierna Podemos. Tolo demás ye accesorio, pero non secundario: ye vital pa esa táctica insistir en que Madrid y Barcelona (especialmente Barcelona) yá lleven un añu pel camín d'esa venezuelización terrible. Ada Colau, diz Rivera, nun sabe xestionar. Cada día que pasa anecia más Rivera cola importancia de que los gobernantes sían, sobre too, xestores eficaces, d'esos que «ponen en valor», favoreciendo les oportunidaes pa los negocios (y sobre too pa los negociantes) y eviten estrangular la economía por mandase d'ideoloxíes desfasaes. Cierto que nun ye Rivera'l que pue presumir de xestión eficaz, una y bones nun tien nenguna esperiencia en xestionar nada, como nun sía una barbacoa esporádica o una despidida de solteru. Pero nada nel so discursu ye, hasta agora, estraño por demás, si tenemos en cuenta qu'equí siguen mandando los mesmos que xeneraron la crisis de la delda.
Onde Rivera cruza la llinia del sentíu común ye al catapultase al otru llau del Atlánticu pa enveredanos esi paralelismu ente Iglesias y Chávez que, otra manera, lleva más d'un añu ocupando les primeres páxines de los periódicos. Quiciás a dalguién se-y olvidó recorda-y a Rivera que, nel imaxinariu del que beben cuasi tolos relatos de campaña, lo normal ye que'l líder, o'l que quier aparentar que ye tal y que ta capacitáu pa timonel del Estáu, solo vaiga de viaxe cuando lu conviden en calidá d'igual. Pa tolo demás, vienen a velu, nun calza él les chiruques (ye un dicir) y se dexa cayer en paracayíes nun campamentu guerrilleru (o se llanta nuna rueda de prensa cola jet set del país, que pal casu). Pa esos menesteres hai ausiliares, collaboradores, mercenarios y soldaos de fortuna. Si Albert Rivera quier dar esa impresión, allá él, pero ye inevitable que nos preguntemos a quién ausilia, con quién collabora, quién de los demás aspirantes a líder va sacar porgüeyu de l'aventura americana d'esti Tintín políticu.
El gran fallu de la táctica riverista ta xusto ehí: en nun esconder la so vocación de facilitador, de mozu de los recaos de quien fuere, da lo mesmo si pa ello hai que saltar un océanu y facer el más olímpicu de los ridículos. Funcionará porque concasa colos planes de los amos del asuntu, pero será un fracasu en términos d'intelixencia política, y nun andamos nesti continente tan sobraos d'eso como pa desdexalo por un platu de lenteyes. Claro que poco más se pue esperar de dalguién que ye capaz de presentase a unes elecciones democrátiques y declarar, a la vez, que les dictadures tamién tienen aspectos positivos, too ello mientres censura a una república estranxera nun se sabe bien si por demasiao dictatorial o por demasiao poco.