Como Franco manda

OPINIÓN

11 oct 2016 . Actualizado a las 12:30 h.

A mediaos de mes cúmplense 48 años de magar Tommie Smith ganó la final olímpica de los 200 metros en México. Con récord del mundo y siendo la primer persona en correr la distancia en menos de venti segundos. Pero esa final nun pasó a la historia pola marca; lo que de verdá se recuerda ye la entrega les medalles. Al sonar l’himno de los Estaos Uníos, Smith y John Carlos -que foi bronce- gacharon la cabeza y llevantaron el puñu con un guante prietu puestu en solidariedá col movimientu Black Power.

El xesto nun cayó en sucu baxeru al Comité Olímpicu Internacional, que los reprendió públicamente. Según Avery Brundage, presidente del COI, lo que ficieron diba en contra de los principos fundamentales del espíritu olímpico. El mesmu Brundage que 32 años primero nun tuvo reparo en celebrar unes olimpiaes na Alemaña nazi de los saludos col brazu espurríu.

El casu de Smith, Carlos o l’australianu Norman -plata na carrera y que careció tamién represalies por apoyar a los estadunidenses- nun foi la primer manifestación política d’un deportista n’ocupar tolos titulares nos medios de comunicación. Un añu y picu primero, el Gran Xuráu Federal de los Estaos Uníos declaraba desertor a Muhammad Ali por negase a dir a la guerra del Vietnam. Por si nun fuera abondo, quitáben-y el título mundial de los pesos pesaos y condenábenlu a cinco años de cárcel que nunca cumplió.

A lo llargo de la historia son munchos los casos y les disciplines onde los deportistas d’elite defendieron publicamente causes polítiques y sociales. Mentrestanto, los sectores más reaccionarios, mazcaraos d’apolíticos, quieren convencenos de que nun hai qu’entemecer el deporte cola política, recordando muncho aquella frase tan famosa que se pon en boca de Franco: «faiga como yo: nun se meta en política». Lo que nunca nos cuenta esa xente ye que si hai un sitiu ideal onde la política y los negocios se desenvuelven a la perfección son los palcos de los estadios de fútbol.

Esti domingo en Colombia falóse muncho de política y algunos deportistas nun quixeron ser la excepción. Depués de 54 años de guerra votábase nun plebiscito pa ratificar o refugar los alcuerdos qu’algamaren les FARC-EP y el gobierno colombianu tres cuatro años de negociación na Habana. Un plebiscito que ganaron los enemigos de la paz por menos de 54.000 votos y con más d’un 60% d’abstención.

Tá tengo delantre, cuando escribo estes ringleres, el cartel col que Nairo Quintana se retrató anguaño n’Asturies a favor de la paz. Una semeya que revolucionó Colombia, pero que nun foi abondo pa que ganara la paz. Nairo dio la cara por una causa xusta, igual que ficiera Lucho Herrera hai 29 años al ganar la Vuelta a España. Como la dieron el Pibe Valderrama, René Higuita, Radamel Falcao, Yuberjén Martínez, Cecilia Baena o Miguel Lora, que pidieron el sí de manera valiente nuna campaña crucial pa ciarrar un conflicto políticu armáu que lleva cientos de miles de muertos y millones de persones desplazaes.

Pero non tol mundo tien el pueblu ente les sos prioridaes, por muncho qu’esti lu adore hasta nos momentos más difíciles. El periodista inglés John Carlin, autor de Playing the Enemy y defensor de la paz en Colombia, pidió-y al fubolista del Rial Madril James Rodríguez que se pronunciara pol sí igual que taben faciendo otros deportistas colombianos. Carlin, que conoció de primer mano la dictadura arxentina y l’apartheid en Sudáfrica sabía lo muncho que podía ayudar el fubolista cucuteñu por trayer la paz al so país. Una declaración pública ye lo que-y pidía Carlin a James nuna votación tan igualada y con una abstención de más de la metá de la población. James ye l’home qu’abre los informativos tolos fines de selmana, sea titular o reserva, y polos güeyos d’él ven millones de persones de tolos estratos sociales. Pero James quixo más mirar pa otra parte. Seguramente esa sea la diferencia ente un indíxena de familia humilde como Nairo, que conoz el sufrimientu de la xente, con un fubolista multimillonariu al que nada-y falta, avezáu como ta a vivir y alternar con xente pa quien la palabra «guerra» nada significa.

Tommie Smith, con once récords del mundo y una medalla d’oro olímpica, tuvo que llimpiar coches porque naide-y quería dar trabayu; pero 48 años depués sigue tando nos corazones de millones de persones que lu tienen como exemplo. James seguramente nunca va llimpiar nengún coche, nin anque sea d’él. James pudo ser como Tommie Smith, John Carlos o Muhammad Alí, pero quixo más ser como Franco y nun se meter en política.

Nun seré yo quien diga a los colombianos cuálos han ser los sos ídolos, pero sí vos puedo asegurar qué nome nunca va llevar el mio fíu Xulián na camiseta la selección.