Esi ye’l futuru. Que les muyeres dominarán la Tierra. Tán más cerca de los procesos de la vida y eso tien el so valir. La Hestoria amuesa los avances sociales como procesos qu’avancen solos, ensin la influyencia de les muyeres. Pero vendrá’l tiempu nel que les muyeres gobernarán el mundu, cuando la intelixencia supere a la fuercia na toma de decisiones. Entós, ye de suponer qu’habrá menos guerres, más solidaridá social, menos malos tratos, menos violaciones, más igualdá d’oportunidaes llaborales, una mayor proteición social, unes rellaciones más personales, menos violencia na sociedá, y meyor comprensión de los problemes humanos. Cola Illustración, nel sieglu XVII, la filosofía moderna anicia’l so repensamientu de les rellaciones humanes y el papel de la muyer nelles, al traviés de la ética, y los drechos humanos. Yá nel sieglu XIX concrétase’l movimientu de muyeres escontra la desigualdá, que nun se considera natural sinón cultural. Esta llucha encuádrase nos drechos universales que conlleven la igualdá de xéneros. Llueu surden la llucha pol sufraxu universal y la educación de la muyer nel ámbitu anglosaxón de finales del sieglo XIX y entamos del XX. N’España, cola II República llógrase la reconocencia del votu femenín en 1931, enantes qu’en Francia o Suiza. Posteriormente apaez el movimientu de lliberación de la muyer nos años 60, col drechu al albuertu, y a la llibertá sexual como exes. Y finalmente preséntanse les vindicaciones sobre les diversidaes femenines, l’ecofeminismu, la transexualidá, la llucha escontra l’acosu sexual, y la internacionalización de la llucha de la muyer polos sos drechos. Dempués tómase conciencia escontra l’estatus del patriarcáu hestóricu y la necesidá de la so tresformación nuna sociedá más igualitaria, xusta y democrática. Anguaño, céntrense los esfuercios en frayar de la división ente lo público y lo privao. Propónse un cambéu pa la reconocencia de la democracia na vida diaria, nes escueles, nes families y nes rellaciones personales. Valorar el trabayu domésticu y condergar la violencia escontra les muyeres. A la escontra, estimula un repartu equilibráu per aciu la conciliación y corresponsabilidá qu’equilibre les rellaciones familiares pa una mayor presencia nes decisiones polítiques, económiques y comunitaries. De toes formes, la cultura igualitaria, como la cultura en xeneral, paez como un barniz sobre dellos instintos de la nuesa especie, y tascando un mizcu pue esfumase. Sieglos dempués de qu’en 1789 la francesa Olimpe de Gouges redautara la Declaración de los Drechos de la Muyer y la Ciudadanía, la violencia de xéneru inda ta presente perdayuri. Y eso ye, ente otres coses, lo qu’hai que torgar darréu.