Ente'l desaniciu de les abeyes, axentes cimeros na polinización de les flores, qu'incide na biodiversidá, y na nuesa alimentación, también puen perdese valioses evoluciones del comportamientu animal. Puen perdese habilidaes sociales perinteresantes nel reinu animal como les citaes por Carranza nel llibru Etología.
No que cinca a la comunicación, un mou mui perfeicionáu de facela.
Cuando una abeya alcuentra una fonte de néctar torna al panal y tresmite a otres obreres información de la fonte. Si l'alimentu s'atopa averáu hasta unos 65 metros, l'abeya fai una danza circular que ye siguida por obreres asitiaes perbaxo. Demientres la danza circular, l'actor tresmite golores de la fonte que son emplegaos polos receutores pa llendar la gueta a determinaes zones al rodiu'l panal. Si la fonte alcuéntrase más llonxana, l'abeya fai una danza más complexa, siguiendo dos círculos en sentíu opuestu con unes vibraciones del so abdome na so interseición. El númberu vegaes que l'abeya fai la danza entera por xunidá de tiempu, el númberu de vegaes que ximielga'l so abdome y la frecuencia de la vibración de les esnales tresmiten información de la distancia a la fonte, útil hasta unos 600 metros. Si la danza faise nel esterior, la direición de la fonte bien determinada pola exa d'interseición de dambos los dos círculos. Nel interior del panal, la exa oriéntase en rellación cola gravedá un ángulu neto al que tien de desviase del sol la obrera que recibe la información cuando salga del panal.
Otru aspeutu ye'l so altruismu social.
Ello ye propiu d'especies que tengan curiáu cooperativu de los xóvenes qu’implica qu'a la cría aidarán más individuos que solo la má. La esistencia de castres estériles d'individuos que nun se reproducen. El solapamientu de xeneraciones que viven al mesmu tiempu.
Esto permite a los xóvenes criar a los sos hermanos más xóvenes mentes nun tienen descendencia.
L'agricultura industrial y los plaguicides, xunto a la perda d'hábitats y los impautos del cambéu climáticu son los axentes qu'amenorguen les poblaciones d'abeyes. Los estudios falen d'una baxada de les poblaciones d'abeyes de más del 25% nos caberos 20 años.
Les alternatives son l'agricultura ecolóxica y la prohibición de productos tósicos pa elles y pa nós, y plaguicides lletales. La Xunión Europea yá restrinxó dellos plaguicides pero nun ye enforma. Tamién el consumu de productos ecolóxicos, de temporada y llocales ye importante pa caltener estos sistemes tan evolucionaos na vida d'estos animales que faen una collecha tan melguera. En tolos sentíos.