Dicen los vieyos que la culpa ye soltera y naide la quier. Na política nun diba ser menos. L’autocrítica queda pa los manuales de dialéctica marxista. Neso da igual la derecha, la izquierda, que’l centro comercial.
Será por eso que nun me chocó nada esti domingo la intervención de Susana Díaz a la hora valorar les primaries del Partíu Socialista. La sevillana, que tuvo menos votos qu’avales, taba arguyosa del sesenta y tantos por cientu les papeletes que sacara n’Andalucía, y dábanos la receta: en casa conócenla y aprécienla por tanto como trabaya pol pueblu. Y digo yo... entós en pasando Despeñaperros bien poco deben trabayar los sos compañeros de batalla. Menudu carambelín envelenáu pa Javier Fernández y compañía.
Por esa regla trés, de poco puede presumir el xestor de la xestora. Con tol aparatu del partíu a favor, el grupu parllamentariu y el gobierno, a la hora la verdá los conceyos más grandes que controlen son Avilés, Carreño, Llanes y Tinéu.
Consultar a les bases nun ye nenguna bromada, sobremanera si te dicen lo que tol mundo sabíamos y confirmaben les encuestes: a Javier Fernández queríenlu más fuera qu’en casa; emponderábenlu y enfotábense nél el PP y los sectores más conservadores, pero refugábalu’l socialismo. Ye jodío vivir cuarenta años del “que vien la derecha” y acabar regalando’l gobierno al partíu más corruptu d’Europa y Oceanía y parte d’América, África y Asia. Al final la trampa rescampla y la maniobra nun cayó en sucu baxeru d’una militancia farto hasta l’alma de que-yos corrieren la galga. Dura la lección pa quien se cre heriede de Pablo Iglesias y les esencies d’un partíu que con xente asina tienlo malo pa cumplir otros 138 años.
El xestor de la xestora nun asomó ayeri pela calle Ferraz. Javier marchó de Mieres pa Somió, seguramente porque s’enquivocó na retonda al garrar l’autopista, avezáu como ta a tirar pa la derecha. Él siempre naguó por pasar El Puerto Payares y volver namás qu’en navidá o pa vacaciones. Tenemos un presidente que-y da perceguera tolo de casa. Por nun ser, nun ye del Uvieo nin del Sporting. Ayeri nun yera Susana la única que tenía algo que celebrar. Él tamién: el Madrid volvía ganar la liga. Naide faló d’ello, pero igual taba na Cibeles. Felicidaes, Javier.