Oficialidá

OPINIÓN

08 sep 2017 . Actualizado a las 05:00 h.

Güei ye'l Día d’Asturies. Deseo a toles asturianes y a tolos asturianos una bona xornada pa pasar, por exemplu, colos collacios y cola familia. Nesti setiembre tamos los socialistes cola atención puesta nes eleiciones internes del 17 y col congresu pa finales de mes. Una de les iniciatives qu'un grupu de militantes vamos defender nes agrupaciones llocales tien que ver cola oficialidá de la Llingua asturiana.

L'enmienda de sustitución del artículu 367 de la Ponencia Marcu del 32º Congresu de la FSA defiende que l'asturianu seya xunto al castellán llingua oficial n'Asturies. Nun queremos escaecer que ensin la reforma del Estatutu d'Autonomía esti pasu nun sedrá efectivu, pero tamién pienso que col apoyu del PSOE podría ser más fácil conseguir l'oxetivu. El conceptu a tener en cuenta pasa por considerar l'asturianu como una ferramienta de comunicación ente persones, non como un problema políticu.

La Llei d'Usu y Promoción del Asturianu de 1998 tien la función de promocionar de manera institucional l'asturianu y el gallego-asturianu na alministración pública. El problema ye que cuasi veinte años dempués la realidá demuestra que fai falta dar un pasu más, quizás xigante, pa protexer y difundir l'asturianu na cai, nel trabayu, nos comercios, nes escueles…

Por esi motivu, yo sofito esta iniciativa pa que la llingua seya parte de la nuesa vida de manera oficial y llegal. ¡Oficialidá y feliz Día d’Asturies!