Nun sé cómo espresalo con xusticia. Ye un conflictu hestóricu non resueltu. Los xudíos foron víctimes de la mayor masacre organizada, l’Holocaustu, y agora paecen ser los verdugos de los palestinos. Despréndese asina de les resoluciones de la Organización de les Naciones Xuníes, la ONX.
El 29 de payares de cada añu, les Naciones Xuníes conmemoren el Día Internacional de Solidaridá col Pueblu Palestín de conformidá colo dimpuesto pola Asamblea Xeneral nes sos resoluciones 32/40 B del 2 d’avientu de 1977. 34/65 D del 12 d’avientu, 61/23 del 1 d’avientu de 2006, ente otres.
La fecha remembra’l día en que, en 1947, l’Asamblea Xeneral aprobó la resolución 181 (II), posteriormente conocida como la resolución de la partición, na cuala estipulábase la creación d’un Estáu xudíu y un Estáu árabe en Palestina. De los Estaos previstos en dicha resolución, hasta’l momentu namái tien creáose ún: Israel.
Cada añu, el Día Internacional de Solidaridá fai un brinde a la comunidá internacional pola oportunidá de centrar la so atención nel fechu de que la cuestión de Palestina inda nun ta resuelta y de que los palestinos entá nun puen exercer los drechos inalienables reconocíos pola Asamblea Xeneral: el drechu al llibre determín ensin inxerencia esterna, el drechu a la independencia y la soberanía nacionales, y el drechu a tornar a los sos llares, d’onde foron desplazaos, y a que se-yos vuelvan los sos bienes.
El 23 d’avientu de 2016 el Conseyu de Seguridá de la ONX aprobó la Resolución 2334 que se pronunció sobre los allugamientos israelinos nos territorios palestinos ocupaos. En dicha resolución, el Conseyu de Seguridá ratificó’l so respaldu a la solución de dos estaos al declarar «que l’establecimientu d’asentamientos por parte d’Israel nel territoriu palestinu ocupáu dende 1967, incluyida Xerusalén Oriental, nun tien validez llegal», espresando amás la so «grave preocupación pol fechu de que la continuación de les actividaes d’asentamientu israelinos tán poniendo en pelligru la viabilidá de la solución biestatal basada nes llendes de 1967.
L’Estáu palestín foi reconocíu por 130 países miembros de la ONX en 2012. El 29 de payares de 2012, l’Asamblea Xeneral decidió conceder al Estáu de Palestina la condición d’Estáu observador non Miembru nes Naciones Xuníes, mesmo que’l Vaticanu.
Esti añu, col nuevu presidente de los Estaos Xuníos d’América, Donald Trump, estos alcuerdos internacionales cimblaron, al declarar ésti que pue valir la solución d’un solu estáu (l’israelín). Dos décades de negociaciones puen finar na colonización dafechu de Palestina por Israel, al marxe del gran pautu internacional representáu poles Naciones Xuníes. Amás, n’ochobre sacó al so país xunto a Israel de la UNESCO.
Pruye que los homes permitan la paz definitiva nesi llugar del mundiu que tanto lo amerita. D’esti mou, respetando la voz mayoritaria del mundiu, podría frayase esi círculu viciáu al que paez atada la Humanidá.