El 5 de xunetu de 1997 el Conceyu Bimenes baxo mandatu del alcalde d’Izquierda Xunida d’Asturies, Joaquín García Gutiérrez Xuacu, declaraba l’asturianu como llingua oficial nel so términu municipal. Y nun foi l’únicu, nos meses siguientes los conceyos de Casu, Castrillón, Morcín, Llangréu, Teberga, Llaviana y Llanera siguieron el mesmu camín. La reivindicación de la equiparación de derechos llingüísticos vivía, aquellos años, unu de los momentos más destacaos na so historia gracies al denomáu Pautu pol autogobiernu y la oficialidá que llegó a provocar qu’hasta’l propiu Presidente de l’Academia de la Llingua Asturiana daquella, Xosé Lluis García Arias, declarara: «En 1996 va consiguise la cooficialidá». Fueron años nos qu’hasta la propia Cherines, güei azote de la mesma de la mano de la derecha más reaccionaria, guardaba una posición ambigua pa cola cuestión y dexaba’l determín en manes del PSOE.
La reforma del Estatutu d’Autonomía aprobada en 1999 zarróse en falsu ensin el cambéu precisu nel artículu 4 pa da-y al asturianu esi rangu. Sicasí, pel camín, aprobóse la Llei d’Usu y Promoción de 1998 que, anque anguaño se demostró ineficiente, foi’l niciu del tímidu desarrollu del asturianu nel sistema educativu y del so usu per parte de les alministraciones. Siendo realistes, magar que ye una Llei mui denostada, yera lo único que podíemos algamar na coxuntura política de la dómina.
Amás, como na cuestión llingüística siempre tenemos una de cal y otra d’arena, aquelles declaraciones d’oficialidá nos conceyos (simbóliques d’otra manera) entamaron a ser impugnaes una tres d’otra pola Delegación del Gobiernu d'España, al traviés de l'abogacía del Estáu y valtaes darréu pol Tribunal Superior de Xusticia d'Asturies.
Mentanto, Bimenes siguió celebrando la so Fiesta de la Oficialidá, rotulando les dependencies municipales n’asturianu, siendo’l primer conceyu en declarar oficial la so toponimia y, a lo último, calteniendo la llingua viva y faciendo un usu normal d’ella. Hasta qu’otra vuelta, el 2 de xunetu del 2016, diecinueve años depués de la primera y coincidiendo cola XX Fiesta de la Oficialidá del Asturianu, Bimenes volvió a facer una declaración d’intenciones faciendo cooficial l’idioma nel conceyu baxo’l gobiernu d'Aitor García Corte (PAS) que cuenta col apoyu d’IX y Xente Yerbato. Facíase n’otru momentu históricu nel que l’alderique sobre la posibilidá d’algamar esi estatus taba enriba la mesa y que posteriormente, col cambéu de posicionamientu del PSOE del 1 d’ochobre de 2017, asitióse más cerca que nunca.
Y asina llegamos a esti sábadu 9 de xunu de 2018. Con una coxuntura política insólita y un clima social más que favorable. Y volvemos pa Bimenes, onde representantes de fuerces polítiques d’estremáu calter tuvimos na XXII Fiesta de la oficialidá, mesmo los que llevamos años defendiéndola como los qu’entamen agora, naguando porque la próxima Fiesta podamos celebrala n’igualdá de derechos. Y ye que, con tolos pilancos, Bimenes sigue onde tuvo siempre y como bien dixo Xosé Antón González Riaño nel so pregón: «Bimenes marca’l camín» y, yo añado, vamos caminalu xuntos.