El 88,8% de los alumnos d'Infantil de Morea quier dar asturianu pero nun puen

Suatea denuncia que el Principáu namás dotó a esta escuela con una maestra d'asturianu a media xornada


Redaccion

Un total de 38 alumnos, el 88,8% del alumnáu d'Infantil del CP de Morea (Ayeri), solicitó voluntariamente recibir clases de llingua asturiana, pero la Conseyería d'Educación nun-yos asignó profesor, denunció'l sindicatu Suatea.

Según señaló'l sindicatu educativu, el Principáu namás dotó a esta escuela con una maestra d'asturianu a media xornada, «a pesar que la dirección del centru y los padres y madres yá lleven reclamando dende'l cursu pasáu la necesidá d'una profesora a tiempu completu».

Nesi sentíu, recordaron qu'estos alumnos lleven recibiendo clases d'asturianu desque empezó la so escolarización con dos años «y ven cómo agora s'ataya arbitrariamente».

Suatea afirmó qu'existen más casos d'alumnos d'Educación Infantil en Xixón y n'Uviéu que, a pesar de la voluntá de les families, nun se-yos permite ser alfabetizados na llingua propia al nun cuntar con un profesor asignáu pola Conseyería

«Actualmente, acabada prácticamente yá la llexislatura, namás poco más de cuarenta centros ufierten conteníos d'Asturianu n'Infantil, lo que sumáu a estos casos, muestra la falta de rigor y compromisu de la Conseyería d'Educación cola enseñanza d'asturianu», sentenciaron.

Valora este artículo

8 votos
Comentarios

El 88,8% de los alumnos d'Infantil de Morea quier dar asturianu pero nun puen