Ana Cano pide una sede pa l'Academia de la Llingua y alvierte que nun firmará contratos d'alquiler
CULTURA
Asegura que'l Principáu comprometióse a buscar un nuevu llocal y a tramitar una llei que desarrolle l'estatus xurídicu de l'Academia.
01 mar 2017 . Actualizado a las 17:23 h.La presidenta de l'Academia de la Llingua Asturiana, Ana Cano, alvirtió esti miércoles al Gobiernu del Princiáu que la institución que preside nun ye una entidad privadá y que nun firmará nengún contratu d'arrendamientu pol llocal qu'ocupa, nel monasteriu de Les Pelayes (Uviéu). Asina, exixó una solución al problema de la so sede social.
Mientres la so comparecenica, nel trescursu de la Comisión d'Estudiu del Réxime de Protección de la Llingua Asturiana, Cano refirió al cambiu d'estatus de la institución, dempués de qu'esti añu recibiera'l so presupuestu como una sovención del Gobiernu autonómicu, «como si fuéramos una entidá privada», esplicó.
Concretamente, los presupuestos del 2017 recueyen una cuantía de 207.000 euros, penriba de los más de 170.000 del añu anterior, pero sin incluir el contratu d'alquiler y los gastos de la sede. Otros años, yera'l Gobiernu asturianu'l que s'encargaba d'ellos, y la so suma ye asemeyada al aumentu presupuestariu d'esti añu.
Cano esplicó que, según el Gobiernu asturianu, el cambiu del estatus de la partida presupuestaria trátase d'un reparu de la intervención, y caltuvo la negativa de l'Academia a «roblar nengún contratu d'arrendamientu». Afirmó que la situación de la Institución ye crítica, y esplicó que'l Gobiernu asturianu citóla pa una nueva reunión sobre esti asuntu dientro de 15 díes. Asegura que'l Principáu comprometióse a buscar un nuevu llocal y a tramitar una llei que desarrolle l'estatus xurídicu de l'Academia.
Recalcó que l'Academia nun ye una institución privada, y que la creó nel so día'l Gobiernu preautonómicu (Conseyu Rexonal d'Asturies). «Los nuesos estatutos aprobáronse na Xunta Xeneral, y la identificación fiscal ye dientro del Principáu».
Según la presidenta de l'Academia, «siempre funcionamos como un organismu del Principáu y nun entendemos por qué agora se nos quier pasar a una sovención, colo qu'eso implica, lo que conlleva que pase a ser una institución privada», añadió. «Nun podemos asumir el personal que tenemos trabayando nin vamos roblar nin un contratu d'arrendamientu», recalcó.
Especialidá
Cano criticó duramente la xestión del Gobiernu asturianu, que, al so xuiciu, «malpenes» ta dando pasos en favor de la normalización del asturianu dende qu'entamó la llexislatura. Dedicó tiempu a falar de la negociación del Executivu autonómicu pa llograr la reconocencia d'especialidá docente.
Considera «imposible» que si'l Gobiernu del Principáu fala con Madrid «nun se puea modificar un decretu d'especialidaes». Na so opinión, pal Gobiernu del estáu la reconocencia de la especialidá ye «pecata minuta», y dio a entender que si nun se toma la decisión ye porque dende Uviéu nun se ta defendiendo «con decisión».