La Selmana de Les Lletres quier reconocer el papel de les muyeres na lliteratura asturiana

La Conseyería d'Educación y Cultura entama una ventena d'actividaes distribuyíes en siete conceyos y en Madrid

Academia de la Llingua
Academia de la Llingua

Oviedo

Del 27 d'abril al 9 de mayu les actividaes de la 38.ª edición de la Selmana de les Lletres Asturianes van reconocer la creación lliteraria y musical n'asturianu y gallego-asturianu. Con un programa d'actividaes bien completu, la Conseyería d'Educación y Cultura quixo homenaxar d'esta vuelta'l papel de les muyeres na lliteratura asturiana.

El lema 'Lletres, femenín plural' resume la variedá que podemos atopar nes voces de les escritores actuales, ensin escaecer figures que yá se reconocieron en Selmanes anteriores.

Una ventena d'actividaes de toles menes (presentaciones de llibros, llectures públiques, certámenes lliterarios, alcuentros escolares, entregues de premios, visites guiaes, conciertos, representaciones teatrales) van llevar a siete conceyos asturianos y a Madrid la lliteratura, la música y el patrimoniu llingüísticu asturianu.

La Selmana empieza'l xueves 27 d'abril cola celebración del Día de les Lletres Asturianes nel Esterior. En collaboración cola Dirección Xeneral d'Emigración y Cooperación al Desenvolvimientu, el Centru Asturianu de Madrid va acoyer una presentación-recital del llibru Escritores asturianes. Antoloxía de testos n'asturianu y gallego-asturianu. La obra colectiva, que recueye creaciones de 92 autores, va presentase tamién el xueves 4 de mayu n'Avilés, na V Feria del Llibru y Discu, y va regalase'l vienres 5 de mayu, Día del Llibru Asturianu, en 59 llibreríes d'Asturies al mercar llibros y discos n'asturianu o en gallego-asturianu.

El martes 2 y el miércoles 3 de mayu, les yá tradicionales visites guiaes en llingua asturiana van dar a conocer a escolinos y adultos la Xunta Xeneral del Principáu, el barriu xixonés de Cimavilla y el cascu históricu d'Uviéu. El martes 2, la Xunta Xeneral va acoyer la llectura pública institucional de testos n'asturianu y gallego-asturianu.

En collaboración col Institutu Asturianu de la Muyer y Polítiques de Mocedá programáronse dos actividaes. El martes 2 de mayu, a les 19.30 hores, la Sala de Cámara del Auditoriu Príncipe Felipe va ser l'escenariu pal actu Muyeres y lletres, un homenaxe a les escritores asturianes cola llectura dramatizada de testos y que va cuntar cola actuación de la cantante Anabel Santiago, ganadora del Premiu al Meyor Cantar del añu 2016. El martes 9 de mayu, a les 19.30 hores, na Sala Borrón d'Uviéu, va celebrase la segunda edición 'd'Entaína a escribir', un concursu de microrrellatos improvisaos n'asturianu pa la mocedá.

La Fundación Aula de les Metáfores de Grau collabora na organización d'un actu'l miércoles 3 de mayu, a les 19.30 hores, onde se van dar los diplomes del IV Premiu de Poesía que se convoca pal alumnáu d'esi conceyu, amás de participar cola llectura de poemes la poeta Ángeles Carbajal, ganadora del Premiu Xuan María Acebal de Poesía 2016.

Corvera súmase a les actividaes de la Selmana con dos actos: el miércoles 3, Versovera, un alcuentru poéticu primero nel centru cultural de Cancienes y depués nel de Les Vegues; y el llunes 8, nesti últimu llugar, una representación teatral basada nos versos de Víctor Manuel.

La V Feria del Llibru y Discu n'asturianu, entamada col Conceyu d'Avilés y l'Asociación de Llibreríes del Principáu d'Asturies, va acoyer ente los díes 4 y 6 de mayu presentaciones de llibros, sesiones de cuentacuentos y alcuentros lliterarios. La Feria va tar instalada nuna carpa na plaza Domingo Álvarez Acebal.

El públicu escolar forma parte fundamental d'esta Selmana y pa ello ta pensada, el xueves 4 de mayu, a les 18.00 hores, nel Teatru de Llaboral Ciudá de la Cultura, la gala d'entrega de premios del IV Certame de Teatru Escolar.

El vienres 5, la escuela pública Santiago Apóstol de Mieres del Camín va ser l'escenariu del actu escolar institucional de celebración la Selmana de les Lletres cola entrega de los premios de los certámenes artísticu y lliterariu. Tamién pal públicu infantil tán pensaos los espectáculos Histories detectivesques y Disculpe, caballeru, nel Teatru de Llaboral Ciudá de la Cultura, el llunes 8 y el martes 9 de mayu, respectivamente, dambos a les 11.00 hores.

El gallego-asturianu va tar presente nel Auditoriu As Quintas, d'A Caridá (El Franco), el sábadu 6 de mayu, a les 19.00 hores, col Homenaxe ás nosas lletras, que nesta ocasión va consistir nuna adaptación especial del espectáculu País malva, al cargu de l'Asociación Música Tradicional Muyeres.

Conoce nuestra newsletter

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Comentarios

La Selmana de Les Lletres quier reconocer el papel de les muyeres na lliteratura asturiana