Xixón acueye esti sábadu'l XXIX Conciertu pola Oficialidá

europa press GIJÓN

CULTURA

Cartel del XXIX Conciertu pola Oficialidá
Cartel del XXIX Conciertu pola Oficialidá

Rodrigo Cuevas, Caldo y Os Rabizos, Herbamora, Cataruxare, LaKadarma, Spanta la Xente, Dixebra y Misiva axuntarán reivindicación y folixa nel Parque Inglés pa reclamar la oficialidá pal asturianu

16 jun 2017 . Actualizado a las 16:17 h.

El Conciertu pola Oficialidá qu'entama cada añu la Xunta pola Defensa de la Llingua Asturiana llega a la XXIX edición y vuelve axuntar reivindicación y folixa, según informó la organización nuna nota de prensa. Esti añu la cita con ún de los principales festivales musicales d'Asturies, va ser el 17 de xunu nel Parque Inglés de Xixón. Esti añu, como novedá, pela tarde va preparase una adaptación de les existoses «Nueches en danza» pal horariu vespertín, onde los grupos Caldo y Os Rabizos, Herbamora y Cantaruxare van ofrecer una actuación mui especial na que tolos asistentes van poder baillar y blincar colos nuestros sones más tradicionales.

Nesta XXIX Conciertu pola Oficialidá tamién va actuar Rodrigo Cuevas, «l'artista de más sonadía dientro del panorama de la escena sonora asturiana, que pela primer vez pa ufrir el so espectáculu nel escenariu musical-reivindicativu del Conciertu pola Oficialidá», comenta la Xunta. A estos nomes súmense los de LaKadarma, formación naveta que nos últimos años ta revolucionando'l mundu de les bandes de gaites; los l.lenizos Spanta la Xente, ún de los grupos de más sonadía de los Valles Mineros; Dixebra, tou un clásicu que tán de xira de conmemoración de los sos trenta años; y los moscones Misiva, una banda de punk-rock con una bona montonera de conciertos al llombu.

El Conciertu pola Oficialidá ye un conciertu reivindicativu entamáu pola Xunta pola Defensa de la Llingua Asturiana pa reclamar la oficialidá pal asturianu. Vien celebrándose dende 1989 en dellos llugares de la xeografía asturiana. Nos díes vinientes van anunciase los sitios onde va poder mercase la entrada.