Academia de la Llingua

Relevu n'Academia de la Llingua

El profesor Xosé Antón González Riaño salió escoyíu nuevu presidente llueu de fináu'l mandatu de cuatro años de Ana Cano


Redacción

El profesor de Ciencies de la Educación de la Universidá d'Uvíeu Xosé Antón González Riaño salió escoyíu como nuevu presidente de l'Academia de la Llingua Asturiana (ALLA) dempués de la renuncia de Ana Cano, que xunto a la su direición cumplió los cuatro años de mandatu. Según la nota de l'ALLA, diere anuncia «va unes selmanes del so determín de nun volver presentase a la reeleición, llueu de 4 mandatos nel cargu».

Xunto a González Riaño acompañaran-y na direición, Marta Mori d'Arriba (vicepresidenta), Xosé Ramón Iglesias Cueva (secretariu), Carme Muñiz Cachón (vicesecrestaria) y Carlos Lastra López (ayalagueru). L'Academia de la Llingua Asturiana dixo «sorrayar y agradecer fondamente l'escomanáu llabor desendolcáu pola direición anterior nos ámbitos sociales y de normativización del idioma, al empar que da anuncia del so enfotu por siguir nuna xera qu’ha empobinar, ensin dulda, hacia'l llogru de la oficialidá de la llingua hestórica de tolos asturianos y asturianes».

Nacíu en Viella-Siero (1956), Xosé Antón González Riaño ye Profesor Titular de la Universidá d'Uviéu donde imparte docencia nel Departamentu de Ciencies de la Educación. La so especialización docente ya investigadora xira al rodiu de la metodoloxía de la enseñanza de les llingües, el billingüismu escolar, los aspeutos sociollingüísticos y socioeducativos arreyaos a la presencia escolar de les llingües, les rellaciones ente la enseñanza llingüística y la interculturalidá, les condiciones de deprendizax de les llingües minoritaries. Miembru de númberu de l'Academia de la Llingua Asturiana dende 1987, yera Vicepresidente de la institución y Responsable del Programa de Formación de la mesma. Al empar, foi l'entamador y direutor de la coleición académica «Estaya Pedagóxica», onde s'espublizaron 20 volúmenes rellacionaos con anovaciones didáutiques pa la enseñanza del asturianu nos centros educativos.

Valora este artículo

4 votos
Etiquetas
Comentarios