«[...] (a) N’orixe, naturaleza, estructura y conducta xeneral, el réxime de Franco ye un réxime de calter fascista, establecíu en bona parte gracies a l’ayuda recibida de l’Alemaña nazi de Hitler y de la Italia fascista de Mussolini;
(b) Mentanto la llucha llarga de les Naciones Uníes contra Hitler y Mussolini, Franco, a pesar de les protestes de contino de los Aliaos, dio una ayuda considerable a les potencies enemigues [...]
(c) Pruebes incontrovertibles demuestren que Franco foi, con Hitler y Mussolini, parte culpable na conspiración de guerra contra aquellos países que finalmente nel trescursu de la guerra mundial formaron el conxuntu de les Naciones Uníes […]» (Resolución 39(I) de l’Asamblea Xeneral de la O.N.U. de 12 d’avientu de 1946).
Pasaron 75 años dende la publicación d’esta Resolución aprobada al calor de la condena internacional pol asesinatu del guerrilleru Cristino Garcia y más de la metá d’ellos en democracia, pero cuestiones tan importantes como ésta siguen ensin apaecer nos llibros de testu, convirtiendo a xeneraciones d’estudiantes n’analfabetos de la nuestra propia historia. Y ye sabío lo que se diz de los pueblos qu’inoren la so propia historia.
Pero la historia nun se cunta namás nos llibros. Los pueblos y les ciudaes tamién tienen el so propiu llibru de testu urbanu, que son los nomes de les cais, les estatues y monumentos que los chisquen. Y ente elles tenemos munches qu’emponderen la Dictadura de Franco, a representantes de los militares golpistes qu’acabaron col réxime llexítimu de la II República, a los sos valores antidemocráticos y fascistes, a persones qu’inclusive en munchos casos destacaron particularmente poles sos acciones represores y xenocides. Y eso, nuna sociedá democrática, nun se pue pasar: son fechos y persones indignes de figurar nun espaciu públicu d’una sociedá sana.
Otra manera, asistimos a un mix de franquismu vieyu y negacionismu nuevu nel marcu d’una fola de relativización cultural y científica que propón la reinterpretación de too y que cuestiona la verdá histórica. Nos últimos años tamos viviendo un resurdir del pensamientu y de les acciones de la estrema derecha: negacionismu de los crímenes del franquismu, profanación de sitios de la memoria, exaltación de la dictadura, defensa del fusilamientu masivu d’opositores políticos/ques y, últimamente, amenaces graves a dirixentes de partíos. Y, lo que ye más esmolecedor, en munches ocasiones con complicidaes evidentes de persones vinculaes a aparatos del Estáu y de dalgunos medios de comunicación, lo mesmo que de representantes electos en parllamentos.
Depués de más de 40 años de vivir nun sistema democráticu, siguimos calteniendo una rémora fascista na nuestra sociedá. Les firíes siguen abiertes y ye menester sanales pa poder pasar páxina y abrir un tiempu nuevu de convivencia democrática sana. Nos últimos años interpunxéronse alredor de cien querelles (por tortures, asesinatos, neñes y neños robaos...) polos crímenes tan graves contra la humanidá cometíos pol franquismu, ensin que nenguna d’elles pudiere travesar l’estragal de los xulgaos y del propiu Tribunal Constitucional aduciendo la vixencia de la Llei d’Amnistía de 1977 y la prescripción de los fechos, desoyendo los informes repetíos de los Rellatores de Derechos Humanos de la ONU que señalen que la falta d’accesu a la xusticia efectiva poles víctimes constituye la torga principal p’algamar la Verdá, Xusticia y Reparación reclamaes. Too esto nun pue entendese ensin el tipu de transición política realizáu y el modelu d’impunidá español instauráu.
Precisamos democratizar les nuestres cais y places tanto como los nuestros llibros de testu y el nuestru sistema xudicial. Ye menester remover toles torgues llegales existentes pa dexar l’accesu a la Xusticia de les víctimes de la Dictadura.
Ye menester la participación protagonista de la ciudadanía na defensa de los valores democráticos y de la consecución de la Verdá, Xusticia y Reparación con garantía de non repetición, pero’l papel de les instituciones nesti procesu ye fundamental. Sofitando la concentración del martes 29 a les 19 hores na Plaza del Fresno d’Uviéu, instamos al equipu de Gobiernu municipal a ponese del llau de la democracia, eliminando d’una vez los nomes franquistes del mapa de la ciudá y retirando inmediatamente símbolos como plaques y monolitos qu’entá permanecen nes nuestres cais.
*Rafael Velasco y Carme Prado.