Iniciativa por Asturianu recuerda a Caunedo que foi'l PP «el que punxo en marcha'l procesu d'oficializar la toponimia» del conceyu
13 jun 2019 . Actualizado a las 18:19 h.L'asociación Iniciativa pol Asturianu recordó-y al portavoz del PP n'Uviéu, Agustín Iglesias Caunedo, que cuando gobernaba'l so partíu na capital d'Asturies usaron el topónimu «Uviéu» en delles ocasiones y que foi Gabino de Lorenzo'l que punxo en marcha procesu pa recuperar los topónimos.
Al traviés d'una nota de prensa, Iniciativa pol asturianu calificó d'avance «positivu» la oficialización del topónimu tradicional de la ciudá d'Uviéu, asina como del restu de nomes de llugar del conceyu, «que tantes veces apaecen nos testos históricos y que son d'usu normal nel día a día de la xente, anque la so falta d'usu nos ámbitos oficiales pueda quita-yos visibilidá».
Con too, recuerden a Agustín Iglesias Caunedo que'l so antecesor Gabino de Lorenzo utilizó'l topónimu en dalgunes ocasiones como nel certamen de folclore Ciudá d'Uviéu, o'l premiu de lliteratura «Uviéu», qu'entamó'l mesmu Conceyu. Otra manera, señalen que De Lorenzo foi l'alcalde que punxo en marcha'l procesu pa oficializar la toponimia.
«Esti pasu, nun ye más que facer efectivu'l cumplimientu de la llei y recuperar y poner en valor la nuestra cultura y el patrimoniu llingüísticu», señala l'asociación, p'añadir que les declaraciones d'Agustín Iglesias Caunedo, qu'afirmó que Wenceslao Lopéz yera'l Puigdemont asturianu por querer oficializar l'usu d'Uviéu xunto a Oviedo, ye «una vergoña y una manipulación mui fea».
Asina, señalen que ye una «verdadera contradicción» cola postura del so partíu, «qu'aprobó col so votu la oficialización de la toponimia tradicional en decenes de conceyos d'Asturies, por nun falar de Galicia». «Amás ye perimportante facer alcordanza de que la Llei d'usu aprobada pol PP establez que van ser oficiales los topónimos na so forma tradicional», recordaron.
Por too eso, Iniciativa pidió a Agustín Iglesias Caunedo una rectificación «y que devuelva al PP d'Uviéu al consensu nel que taba sobre esta cuestión», mentes qu'al Conceyu d'Uviéu piden rapidez nel procesu «y que se faiga una campaña d'información y sensibilización sobre la oficialización de la toponimia tradicional».