El pasáu d'Asturies ye grande y complexu. El presente nun tien un aquel risón, sinón amurniáu poles crisis que dende hai años castiguen a la sociedá. Pero, ¿y el futuru?
El futuru depende de lo que se faiga agora y eso implica una responsabilidá. A l'Academia de la Llingua Asturiana como institución correspuénde-y proponer la rempuesta al desafíu que vien en cuantes a la llingua y a la cultura asturianes.
Tenemos una llingua que naz nos raigaños d'Europa y que xune y troquela la personalidá de la cultura astur. Tantos sieglos d'historia dexaren mui valoratibles creaciones lliteraries. Y anque esta llingua anduvo siempre castigada poles autoridaes y hasta hai poco prohibióse nes escueles, el pueblu siguió calteniéndola. Ye, entós, necesario da-y una oportunidá al tiempu que ta por venir.
Ensin cooficialidá l'asturianu tien zarraes les puertes que lleven al futuru: vive marxinada ya invisible. Amás de ser una inxusticia, esto torga les posibilidades d'un crecimientu curiosu. Ye verdá qu'esta llingua llogró caltenese a lo llargo de los sieglos, pero les coses son diferentes nel presente: el poder de los medios y la difusión electrónica de la cultura tán rompiendo les vieyes formes de tresmisión llingüística. Y asina les llingües marxinaes van quedar más arrequexaes entovía.
Escontra esti penosu llevar la llingua al desaniciu, la cooficialidá del asturianu sedría un bien capaz de dar al futuru más fuerza, más autoestima y más confianza. Y esto necesítalo la sociedá asturiana, depués de les frustraciones y decepciones que dexó la crisis.
Nos caberos años abriérense nueves estayes y semóse en nuevos espacios. Cada vez vertebra más la llingua asturiana les actividaes culturales y más coleutivos s'identifiquen con esti llabor. L'Academia tien puestes les bases de calter filolóxicu pa que la clas política normalice la llingua asturiana como un bien coleutivu. Y los políticos tienen que tener en cuenta dos realidaes sociolóxiques. Per un llau, la política negativa ta faciendo que l'asturianu nun pueda avanzar. Pero, per otru, la xente más xoven, el futuru, tien una actitú favoratible a normalización del asturianu pa que la cultura asturiana brille otra vuelta. Per ehí va'l futuru.