En mediu d’esta pandemia paecióme interesante volver la vista hacia Arthur Conan Doyle, un home arguyosu de les sos raíces y de la so cultura. Esti escocés de ñacimientu y británicu por convencimientu, qu’estudió medicina por complacer a so ma y que la abandonó pa ser escritor depués de qu’una gripe casi lu llevara a la tumba. En realidá descubriera la so pasión cuando cursó los estudios nun internáu n'Inglaterra, onde llevó más d'una paliza pola so rebeldía hacia un sistema educativu victorianu mui severu. Sicasí, ellí afayó les sos cualidaes lliteraries, yá que se decató que los sos compañeros quedaben estelaos colos cuentos qu'inventaba. Pero, amás de too esto, Conan Doyle foi un aventureru que viaxó a llugares exóticos y a llatitúes remotes na nave ballenera Hope na que s‘enroló como ciruxanu; participó en dos guerres y en dos elecciones parllamentaries, y llegó a ser una voz prestixosa nos principales periódicos del país, abanderando’l movimimientu sufraxista y la llei de divorciu. Asina entós namás hai qu’entrugase d’ónde sacaba'l tiempu pa tar en tantos frentes y producir tola obra que produxo. Nel so palmarés tán numberoses noveles históriques, la creación de célebres personaxes emblemáticos, anque’l más conocíu y col qu’algamó l’ésitu foi col famosu detective Sherlock Holmes; de privilexada mente analítica y que, lo mesmo que don Quixote, diba siempres acompañáu d’un fiel escuderu, abondo más torpe, el doctor Watson. Les histories al rodiu de Sherlock Holmes namás foron pa Doyle un pasatiempu; sicasí, dexónos sesenta y ocho rellatos pal disfrute de los llectores. Ello ye que Doyle, cansáu d’un personaxe que tenía más fama qu’él, decidió matalu, pero como tantes persones yá lu consideraben un héroe, produxéronse grandes protestes, sobremanera de los entusiastes llectores, pero tamién de so ma, polo que nun-y quedó mas remediu que dar marcha atrás y resucitalu, dalgo que casaba poco col espíritu racional del detective.
Muncha xente entrúgase cómo un home como Arthur Conan Doyle, almirable, polifacéticu y con una llúcida mente científica, creador de Sherlock Holmes, la personificación del empirismu y del poder de la razón, con escelentes poderes de razonamientu deductivu pa resolver los casos más enguedeyaos, creyía posible falar colos muertos. El casu ye que taba influyenciáu poles sos idees relixoses, pero sobremanera pola masacre que suponxo la Primer Guerra Mundial, na que morrieron doce de los sos familiares, amás del fíu mayor, por causa de la “gripe española”, dexándolu con un gran vacíu qu’intentó enllenar col espiritismu, que naquel momentu tenía muncha consideración y siguimientu. Foi paradóxico que nun ficiere casu al so amigu, l’ilusionista Harry Houdini, que lu alvirtió en munches ocasiones de que los dirixentes d’esi movimientu namás yeren charranes ensin escrúpulos que s’aprovechaben del dolor de tantes persones que perdieren a los sos seres queríos.
Amás de dedicase a falar colos muertos,Arthur Conan Doyle espardió pel mundu la palabra de dos moces que presentaron semeyes con fades coles que dicíen que falaben. L’escritor arriesgó tola so reputación al dar veracidá a una chancia d’adolescentes, anque muncha xente lu alvirtió de que yeren tosques falsificaciones. Pasaron 66 años enantes de que les impostores reconocieran el so engañu. Elles enxamás pensaron qu’una broma fata llegare a convertise en viral, precisamente porque’l creador del detective más intelixente del mundu lo diera por cierto. Y confesaron que nun s’atrevieran a dicir enantes la verdá por nun contradicir la versión d’un home al qu’almiraben.
Voltaire dicía que la primera llei natural ye perdonanos les fataes yá que naide tamos libres delles. A Einstein paecía-y que la estupidez humana yera infinita y que lo peor yera nun reconocelo. Con Doyle vemos que naide, por mui intelixente que seya, ta llibre de dicir o facer bobaes nun momentu de la so vida. ¿Cómo reaccionaría Doyle énte una pandemia como’l coronavirus? Visto lo visto ye difícil prevelo. Quiciabes ye más previsible lo que fadría Sherlock Holmes. Abúltame qu’a la mente privilexada d’esti investigador costaría-y poco desmontar les ocurrencies de dalgunos políticos como Alexander Lukashenko, presidente de Bielorusia que recomienda sauna, vodka y trabayu pa matar el virus o les del presidente d’Estaos Xuníos, Donald Trump, que fala del emplegu d’inyecciones de desinfestante escontra’l virus o tomar medicamentos que, amás de ser peligrosos pa la salú, nun tienen sofitu nengún de la comunidá científica.
Ye mui posible tamién que Sherlock Holmes denunciaría les 507 mentires, alertes falses y desinformaciones sobre la COVID-19 que naveguen pela rede. Vamos centranos en dalgunes d’elles: facer gárgares de sal, tomar vitamina C y omega 3, beber fervíos de plantes medicinales, recurrir a la homeopatía, a la medicina tradicional china, tomar antibióticos, superallimentos, ayu, llimón, cocaína o otres drogues. Nin esos alimentos nin, de toes toes, bebíes como’l té, vinu, café o infusiones, alcohol, cloru o desinfestantes acaben col coronavirus. Ye más, dalgunes puen llegar a ser mui peligroses, como nel casu d’Irán onde morrieron munches persones por tomar bebíes alcohóliques onde amestaben alcohol metílico y llexía.
El gran neurocientíficu alemán Gerd Gigerenzer dicía qu’en delles ocasiones nun podemos poner en marcha el "mou llistu" pola complexidá de la situación, pero ensin dulda deberíemos facer un esfuerzu por dexar el “modu fatu” escaecíu nun caxón ante una pandemia d’esti tipu que provoca tantes pérdides humanes. Otra cosa diferente sedría que la vida fuera igual que la lliteratura y tuviéremos el poder d’Arthur Conan Doyle de resucitar, como fizo con Sherlock Holmes.