Hacia 1839 Afganistán yera un reinu independiente que sufría una inestabilidá política crónica por mor de les lluches internes y les inxerencies del esterior p’alquirir un valor estratéxicu crucial como territoriu de contactu ente británicos y rusos. Los británicos, al convertir Afganistán nun baluarte frente a Rusia, depunxeron al emir afganu Dost Mohammad Khan pa poner a un gobernante títere nel so llugar. La situación en Kabul foi faciéndose cada día más inestable, sobremanera dende 1841: el país sufría una crisis económica y les rellaciones ente les tropes d'ocupación y la población yeren malísimes por causa de les repitíes acusaciones contra los soldaos por nun respetar a les muyeres locales. Tando asina les coses, Akbar Khan encabezó una rebelión que conduxo a la masacre del exércitu foriatu por mor de les equivocaciones de los militares británicos. Y una muyer, Malalai, foi la heroína qu’encarnó la tradición de desafíu de les afganes; retó a morrer combatiendo escontra los ingleses. A lo cabero l’antiguu emir volvió.
Va cien años, cuando s’ellaboró la primer Constitución afgana, cinco muyeres participaron na so redacción. Daquella, dalgunes d’elles trabayaben na industria y munches viaxaben al estranxeru pa estudiar, por casu a Turquía. Y entós, de sópitu, tou camudó. En 1979, tres la ocupación soviética prevalecieron les idees de los islamistes y los muyahidines. La cultura de la violencia sustituyó a la cultura de la paz. El país vivió una dómina bien difícil. La xida rusa foi l’ayuda a un país hermanu col qu’había llazos d'amistá y cooperación yá qu'un añu antes volviérase comunista al traviés d'un golpe d'Estáu. Nun cuntaron con que teníen qu’enfrentase al movimientu de resistencia conocíu como los muyahidines, armáu polos estaounidenses, financiáu polos saudís y sofitáu loxísticamente por Pakistán. Fueron diez años de conflictu hasta que los afganos vencieron al Exércitu roxu. Hai que dicir que les revueltes estudiantiles contra los soviéticos partieron en gran midida de les escueles femenines. Les moces acusaben a los soldaos afganos pol so sofitu al ocupante. Trenta de los 50 estudiantes que morrieron n'abril de 1980 yeren muyeres. Cientos d’elles fueron encarcelaes pola so rebeldía. El casu ye que’l gobiernu que salió de la resistencia tocó-y xestionar les lluches internes y la ruina económica que provocó'l caos y el xurdimientu de los talibán, un movimientu d'estudiantes islamistes ultraconservadores nacíu en Pakistán nel sieglu XX, orixe d'Al Qaeda y del Estáu Islámicu. En 1996 la guerrilla arrampuñó la presidencia al líder muyahidín Burhanuddin Rabban, unu de los héroes de la victoria frente a los soviéticos. N’actualidá ésti grupu ultraconservador constitúyese como un emiratu asambleariu nel que impera la sharia, la llei islámica. Ente otres midíes, impusieron les execuciones públiques, los castigos físicos, llatigazos o l’amputación de miembros por delitos menores; les muyeres quedaron indefenses y ensin derechos, obligáronles a cubrise col burka y prohibióse que les neñes, a partir de los 10 años, fueran a los colexos, quedando la educación namás pa los homes. Arriendes, desaniciaron cualquier espresión cultural (cine, música, televisión…). Los homes cayíos na guerra dexaren a les muyeres viudes ensin recursos y los talibán prohibió-yos trabayar, una prohibición que respuende a una interpretación mui rigurosa del islam -recordemos equí que la primer muyer de Mahoma yera propietaria y xestionaba un negociu de caravanes-. El casu ye que, como les viudes vivíen na miseria, munches d'elles viéronse obligaes a exercer la prostitución nes condiciones más míseres. Fueron arrestaes y llapidaes nos espacios públicos ensin piedá.
Y nun hai dos ensin tres. Depués del atentáu del 11-S, Bush prometió que los talibán pagaríen un preciu mui altu. La llamada Operación Llibertá Duradera supunxo «una llarga campaña como nunca enantes se viere». Estaos Xuníos y la OTAN prometieron lluchar contra la corrupción y ameyorar la seguridá y trazar un futuru promedor al pueblu afganu, sobremanera pa les muyeres. Pa llograr qu’hubiere una democracia d'estilu occidental EEUU gastó más d’un billón d’euros nesti país probe dafechu. Hebo éxitos iniciales: construyéronse escueles, hospitales yá instalaciones públiques. Miles de neñes y moces, escluyíes de la educación pol réxime talibán, asistieron a la escuela y a la universidá, incorporándose tamién al mundu del trabayu y participando na vida pública. Amás, xurdieron unos medios de comunicación independientes y, anque la xusticia nun taba a l’altura de les demandes, gracies a la nueva llei tipificó como delitos penales 22 actos d'abusu contra muyeres. Per otru llau, la Constitución adoptada en 2003 aseguró los derechos fundamentales d'homes y muyeres, ya inclúi disposiciones por qu'haya una discriminación positiva que favoreza a la muyer. Sicasí, la corrupción foi’l principal cáncer: robáronse o malversáronse cientos de millones de dólares en dineru de reconstrucción, mentanto la población nun algamaba les necesidaes más básiques.
El ministru de Defensa del Reinu Xuníu, Ben Wallace, responsabiliza directamente al anterior presidente d'Estaos Xuníos, Donald Trump pola cayida d’Afganistan en manes de los talibán por aceptar un alcuerdu «podre» col movimientu talibán, robláu en 2020, que ye un erru de llacerioses consecuencies pa la comunidá internacional. «Al Qaeda probablemente va tornar». Alvirtió tamién que nun yera'l momentu apropiáu pa retirar d'Afganistán les tropes d'Estaos Xuníos y otros miembros de la OTAN.
Énte esta situación xurden munches entrugues: ¿Cómo pudo ser que Estaos Xuníos colocara a los más corruptos y cobardes como gobernantes locales? ¿Si tal como diz Biden América nun tuvo por oxetivu crear una democracia, por qué se quedaron ellí tantu tiempu? ¿Cómo pue ser posible que’l presidente de EEUU culpe namás d’esti descalabru al exércitu afganu? ¿Cómo se permitió que’l que yera’l presidente afganu escapara de Kabul con cuatro coches y un helicópteru llenos de dineru dexando, según un voceru de la embaxada rusa en Kabul, una parte sobre'l terrén por falta d’espacio? ¿Volverán Al-Qaeda, el Estáu Islámicu y otros grupos militantes pa convertise otra vuelta nun santuariu terrorista onde domine otra vuelta la sociedad patriarcal y misóxina?
Hai munches duldes y munches entrugues ensin respuesta, anque tal como diz l'activista de derechos de la muyer Fawzia Koofi, que considera a los talibán criminales, «les muyeres d'Afganistán son la población que cuerre un peligru mayor» polo que-yos pronostica un negru futuru. La defensora de los derechos de la muyer Humira Saquib pide ayuda al restu de los países pa salvar les vides de les activistes, les defensores de los derechos humanos y les periodistes, al tiempu que ve necesario una garantía internacional pa protexer les sos vides. Ello ye que resulta estremecedor ver les imáxenes de la directora afgana de cine Sahraa Karimi fuxendo del país y pidiendo la intervención de la comunidá internacional.
Ante l’inminente peligru que supón la vuelta del réxime talibán, ¿podemos permanecer impasibles mirando pa otru llau?